TIRANË- Ish-reperi Fero ia ka dalë të fitojë kujdestarinë e së bijës për 1 vit, sipas një akt-vendimi të dhënë nga Gjykata Themelore e Gjilanit.
“Falënderoj Gjykatën Themelore të Gjilanit për drejtësi dhe korrektësi. Po, mua më është besuar vajza, për një vit”, është shprehur Feronit Shabani pas vendimit të gjykatës.
Sipas vendimit, vajza e tij dhe e modeles Arbenita Ismajli, Nina, mund të qëndrojë gjatë javës me të atin dhe gjatë fundjavës me të ëmën.
Ndërkohë Fero ka postuar një seri me video në “Instastory”, ku vogëlushja duket e lumtur teksa luan me lodrat e saj.
Kujtojmë se Fero pak ditë më parë bëri bujë me deklaratat e tij, ku thoshte se ish-bashkëshortja ka shkelur rregullat gjyqësore, duke e marrë vajzën jashtë vendit pa autorizimin e tij.
Reperi gjithashtu deklaroi se ishte rënduar emocionalisht nga kjo situatë, duke qenë se sipas tij, kjo shkelje nga ish gruaja e tij kishte ndodhur disa herë.
