ITALI- Shqiptarët sërish në krye të organizatave të trafikut të drogës dhe në shënjestër të autoriteteve italiane. Autoritetet e vendit fqinj goditën një organizatë e madhe kriminale e trafikut ndërkombëtar të drogës, e përbërë kryesisht nga shtetas shqiptarë.
Arrestime dhe droga e sekuestruar
Në kuadër të operacionit të koduar “Caveau 38”, 52 persona janë vënë nën hetim, ndërsa 6 janë arrestuar në flagrancë. Gjatë kontrolleve janë sekuestruar rreth 32 kilogramë lëndë narkotike, përfshirë kokainë, heroinë dhe marihuanë, si dhe 1.5 milionë euro para të gatshme. Autoritetet kanë zbuluar gjithashtu tetë kilogramë lingota ari të shkrirë, të gjetura në impiantet e dy kompanive të përpunimit të metaleve të çmuara në Milano dhe Alessandria.
Sipas mediave italiane, hetimet, të nisura nga Guardia di Finanza në Lecco, zbuluan një rrjet që shpërndante lëndë narkotike me shumicë mes Shqipërisë, Holandës, Gjermanisë dhe Italisë. Konretisht, raportohet se hetimi nisi pas kontrolleve ndaj një rrjeti që shpërndante drogë në parqet publike të Cernusco Lombardone dhe Merate, por më pas u zgjerua duke zbuluar një strukturë të mirëorganizuar të trafikimit ndërkombëtar.
Sipas hetimeve, organizata kishte ndërtuar një mekanizëm të gjerë për transportimin e drogës drejt Italisë dhe kthimin e fitimeve në Shqipëri. Gjatë periudhës 2019–2022, në Italinë e Veriut dyshohet se kanë mbërritur të paktën 250 kilogramë kokainë, ndërsa në drejtim të kundërt janë transferuar rreth 14 milionë euro të ardhura nga aktiviteti kriminal.
Një banesë në Burago Molgora, dyshohet se të ketë qenë baza kryesore e organizatës, ku ruanin paratë përpara se t'i transportoni fizikisht drejt Shqipërisë. Operacioni “Caveau 38” mori këtë emër pikërisht nga adresa e kësaj banese, në numrin 38 të rrugës.
Por, si ranë autoritetet në gjurmët e organizatës? Për të zbuluar mënyrën e funksionimit të grupit, hetuesit përdorën përgjime, vëzhgime, gjurmues dhe analiza të komunikimeve të anëtarëve të organizatës. Sipas autoriteteve, droga dhe paratë transportoheshin të fshehura në ndarje të posaçme të automjeteve dhe kamionëve.
"Droga dhe paratë transportoheshin të fshehura në funde të rreme, në kamionë ose makina të pastra ose të dezinfektuara", thonë autoritetet.
Sipas hetuesve, anëtarët e organizatës kishin role të përcaktuara dhe paguheshin me shuma fikse, ndërsa për të garantuar transportimin dhe dorëzimin e drogës e parave përdornin kode, simbole dhe kartëmonedha të shënuara.
Në dosjen e këtij hetimi shfaqet edhe një emër i njohur për autoritetet italiane. Bëhet fjalë për Genti Berishën, 26-vjeçarin shqiptar që shkaktoi vdekjen e një efektivi të policisë lokale në Milano, pas një ndjekjeje me shpejtësi të lartë.
Sipas mediave italiane, Berisha rezulton i përfshirë edhe në hetimin për trafikun ndërkombëtar të drogës dhe pastrimin e parave. Emri i tij është rishfaqur në dosjen e operacionit “Caveau 38”, të drejtuar nga Drejtoria e Antimafias në Milano, ku u zbulua një skemë e dyshuar kriminale që lidhet me trafikimin e 240 kilogramëve kokainë dhe pastrimin e të paktën 14 milionë eurove.
Kush është Genti Berisha?
Genti Berisha është 26-vjeçari i natës së 22-23 qershorit, kur, duke drejtuar një SUV Audi Q8 me qira, nuk u ndal në një pikë kontrolli në Via Vittorini, duke shkaktuar kështu ndjekjen gjatë së cilës humbi jetën efektivi 39-vjeçar i policisë. Berisha, orë më vonë nga ngjarja, shprehu pendesë në gjykatë, i kërkoi falje familjes së viktimës dhe deklaroi se ishte i gatshëm të dëmshpërblente familjen. Gjykata e la nën arrest shtëpie.
Berisha dhe trafiku ndërkombëtar i drogës
Emri i Berishës u rishfaq këtë javë në hetimin "Caveau 38 " nga Drejtoria e Qarkut Antimafia e Milanos, e cila rindërtoi një skemë ndërkombëtare pastrimi parash që përfshinte të paktën 14 milionë euro në para të gatshme nga trafikimi i 240 kilogramëve kokainë. Paratë u konvertuan në 8 kilogramë shufra ari, ato të gjurmuara nga Njësia e Policisë Financiare të Lecco-s - përmes kompanive italiane të përpunimit të metaleve të çmuara në zonën e Alessandria-s të përdorura si fasada. Ari më pas u transferua nga Italia në destinacionin e tij përfundimtar: Shqipërinë.
Në dokumentin prej 24 faqesh thuhet se Genti Berisha ishte një nga personat të cilëve duhej t'u dorëzoheshin “fitimet e paligjshme” nga trafiku i drogës. Madje, paratë duhej të dorëzoheshin drejtpërdrejt në “banesën e tyre”.
Biseda e koduar: "Vëlla... më dërgo ato para në Alikante."
Ai diskuton me 26-vjeçarin 300,000 euro që do të dorëzohen në Këln të Gjermanisë dhe do të vihen në dispozicion në Alicante të Spanjës. "Vëlla... më dërgo ato para në Alicante... sepse jam i lidhur me Këlnin", shkruan ai. Berisha dërgon një foto me adresën gjermane - Kalk-Mulheimer Strasse 268 - ku "korrieri" duhet të "dorëzojë paratë": 366,650 euro.
“Ai shoku yt, vëlla, po m’i sjell këtu... 355,000 + 3% .” Adresa është shtëpia e Ilir Ahmetajt, një nga pikat e mbledhjes së parave të gatshme që hetuesit e lidhin me trafikun e kokainës. Më 25 nëntor 2021, një tjetër Berishë nga familja shqiptare, Hashimi, i jep një punonjësi të kompanisë Alessandria 367,300 euro në kartëmonedha. Dy ditë më vonë, ai tërheq 7.2 kilogramë ari midis Rocchetta Ligure dhe Valmadonna, duke i fshehur ato në pjesën e poshtme të rreme të një Mercedesi që po shkonte në Shqipëri. Përgjuesit e instaluar në makinë regjistrojnë bisedat dhe lëvizjet./ZËRI
