VLORË-Në vijim të hetimit pë zbardhjen e ngjarjes së rëndë në Dhërmi, ku 31-vjeçari Eraldo Nevruzi u vra nga bashkëpronari i hotelit ku punonte, Policia e Vlorës ka ndaluar shoferin e ambulancës që po transportonte për në morgun e Vlorës, trupin e pajetë të viktimës. Raportohet se 62-vjeçari kishte filmuar me aparat celular trupin e pajetë për t'ua dërguar burimeve mediatike me qëllim publikimin. Shoferi akuzohet për “Zbulim të akteve dhe të dhënave sekrete”.
Njoftimi i policisë:
Në vijim të veprimeve hetimore që po kryhen nga grupi hetimor për dokumentimin e plotë ligjor të vrasjes së shtetasit E. N., grupi hetimor ka marrë informacion se shoferi i autoambulancës që po transportonte për në morgun e Vlorës trupin e shtetasit E. N., i cili u vra me armë zjarri nga shtetasi G. Sh., kishte filmuar me aparat celular trupin e pajetë për t'ua dërguar burimeve mediatike me qëllim publikimin.
Bazuar në këtë informacion, shtetasit A. I., 62 vjeç, me detyrë shofer i ambulancës së morgut, i është bërë këqyrja e aparatit celular nga grupi hetimor, ku i janë gjetur pamjet filmike të trupit të shtetasit E. N., të cilat ua kishte dërguar burimeve mediatike me qëllim publikimin.
Në vijim të veprimeve, u bë ndalimi i shtetasit A. I., 62 vjeç, me detyrë shofer i ambulancës së morgut Vlorë, për veprën penale “Zbulimi i akteve dhe të dhënave sekrete”.
Drejtoria Vendore e Policisë Vlorë falënderon gazetarët që nuk pranuan të publikonin videon e dërguar nga ky shtetas të trupit të pajetë të shtetasit E. N.
