TIRANË- Komisioni i Posaçëm për Reformën Zgjedhorë i është drejtuar zyrtarisht me kërkesë OSBE/ODIHR-it që të caktojë eskpertë për t'iu bashkuar grupit të punës.
Në një shkresë të firmosur nga dy bashkëkryetarët Damian Gjiknuri dhe Oerd Bylykbashi, komisioni kërkon që ekspertët të kontribuojnë drejtpërdrejt në hartimin e ndryshimeve zgjedhore.
Siç theksohet edhe në letër, angazhimi i ekspertëve do të ndihmojë në vijimin dhe përmbylljen e punës së nisur, përmes trajtimit të çështjeve të mbetura dhe reflektimit të rekomandimeve të organizatës në ndryshimet ligjore.
"Në cilësinë e bashkëkryetarëve të Komisionit të Posaçëm Parlamentar për Realizimin e Reformës Zgjedhore, dëshirojmë të shprehim vlerësimin tonë për bashkëpunimin e vazhdueshëm dhe mbështetjen e OSBE/ODIHR-it në përmirësimin e legjislacionit dhe të proceseve zgjedhore në Republikën e Shqipërisë.
Në mbledhjen e zhvilluar më datë 17.11.2026, Komisioni vendosi t’i drejtohet OSBE/ODIHR-it me kërkesën për caktimin e ekspertëve, të cilët do t’i bashkohen grupit të ekspertëve të Komisionit dhe do të kontribuojnë drejtpërdrejt në hartimin e projektakteve në kuadër të reformës zgjedhore.
Angazhimi i këtyre ekspertëve do të mbështesë vijimin dhe përmbylljen e punës së nisur, duke ndihmuar në trajtimin e çështjeve të mbetura dhe në reflektimin e rekomandimeve të OSBE/ODIHR-it, në përputhje me standardet ndërkombëtare për zgjedhje demokratike. Përfshirja e tyre në procesin e hartimit do të mundësojë ofrimin e ekspertizës së specializuar gjatë përgatitjes dhe finalizimit të projektakteve.
Në zbatim të këtij vendimi, do të vlerësonim mbështetjen tuaj për caktimin e ekspertëve dhe njoftimin e emrave të tyre, me qëllim përfshirjen në veprimtarinë e grupit të ekspertëve të Komisionit.
Duke ju falënderuar për bashkëpunimin dhe kontributin tuaj të vazhdueshëm, mbetemi të angazhuar për vijimin e një procesi gjithëpërfshirës, të mbështetur në ekspertizën profesionale dhe në rekomandimet ndërkombëtare", thuhet në letër.

/ZËRI