POGRADEC- Ministri i Punëve të Brendshme, Besfort Lamallari, ka reaguar pas takimit me kryeministrin Edi Rama dhe skuadrën qeverisëse në Pogradec, ku është diskutuar përgatitja e vitit të dytë të mandatit qeverisës.
Përmes një reagimi në rrjetet sociale, Lamallari ka bërë një bilanc të punës së deritanishme në Ministrinë e Brendshme, ndërsa ka renditur edhe prioritetet për periudhën në vijim.
“Në takimin me kryeministrin Rama dhe skuadrën tonë qeverisëse për përgatitjen e vitit të dytë të mandatit tonë qeverisës. Prezantova disa nga punët e mira që kemi bërë përgjatë këtyre muajve në Ministrinë e Brendshme dhe prioritetet e panegociueshme në vazhdim, me fokus sigurinë publike, modernizimin e Policisë së Shtetit, luftën kundër paligjshmërisë dhe rritjen e standardeve të shërbimit ndaj qytetarëve”, shkruan Lamallari.
Ministri thekson gjithashtu se objektivi i qeverisë mbetet ndërtimi i një marrëdhënieje të re me qytetarët dhe avancimi i Shqipërisë drejt anëtarësimit në Bashkimin Europian.
“Besa është një udhërrëfyes i çmuar e dokument strategjik drejt marrëdhënies së re që ne do të ndërtojmë me qytetarët dhe jetësimit të objektivit tonë ambicioz për Shqipërinë 2030 në BE”, shprehet Lamallari.
/ZËRI
