"Në ankth për vendimin"/ Kurti për Thaçin, Veselin, Selimin e Krasniqin: Asnjë gjykatë s'mund ta njollosë UÇK-në (VIDEO)
KOSOVË- Gjatë seancës së sotme të jashtëzkonshme në Kuvendin e Kosovës, Albin Kurti e nisi fjalën e tij me gjyqin e ish-drejtuesve të Ushtrisë Çlirimtare të Kosovës në Hagë.
Nga foltorja e Kuvendit, pak para se të prezantonte emrat e kabinetit të ri qeveritar, Kurti u shpreh se gjyqi ndaj ish-krerëve të UÇK-së është i padrejtë, pasi Ushtria Çlirimtare e Kosovës ka luftuar për lirinë e vendit. Ai deklaroi se qëndrimi i qeverisë që drejton mbetet i pandryshuar dhe i qartë për këtë çështje, ndërsa shtoi se asnjë gjykatë nuk mund ta njollisë UÇK-në.
"Këto ditë të gjithë jemi në ankth në prag të vendimit të procesit gjyqësor ndaj drejtuesve të UÇK-së, Hashim Thaçi, Kadri Veseli, Rexhep Selimi e Jakup Krasniqi. Kërkesa e Prokurorisë është e padrejtë dhe e pabesueshme, sepse është në shpërputhje të vërtetës historike të popullit tonë dhe drejtësinë e luftës tonë çlirimtare. Qëndrimi i Qeverisë që unë e drejtoj është i njëjtë dhe i qartë. Në Kosovë janë kryer krime lufte, krime kundër njerëzimit dhe gjenocid ndaj popullatës civile. Ato i ka kryer regjimi i Jugosllavisë së Serbisë nën Millosheviqin. Asnjë gjykatë vendore apo ndërkombëtare nuk mund ta njollosë UÇK-në", tha Kurti.
Katër ish-krerët e UÇK-së ndodhen në paraburgim në Hagë që nga viti 2020, ndërsa Prokuroria i akuzon për krime lufte dhe krime kundër njerëzimit, akuza të cilat ata i kanë mohuar. Sipas aktakuzës, të akuzuarit mbajnë përgjegjësi edhe për veprimet e personave nën komandën e tyre. Gjatë procesit gjyqësor janë shqyrtuar qindra prova dhe janë dëgjuar dëshmitarë nga të dyja palët./ZËRI
Zgjidhet Qeveria e re e Kosovës në Kuvend, Kurti për herë të katërt kryeministër
KOSOVË- Kuvendi i Kosovës ka votuar Qeverinë e re të udhëhequr nga Albin Kurti. Në seancën e jashtëzakonshme të mbledhur këtë të dielë, Qeveria 'Kurti 4' mori mbështetjen e shumicës së deputetëve në parlament, duke marrë 62 vota pro, 8 kundër dhe asnjë abstenim.
Ndërkohë, para votimit, Kurti prezantoi në Kuvend emrat e kabinetit të ri qeveritar. Kurti u mandatua për formimin e Qeverisë së ri, paraditen e sotme, nga ushtruesja e detyrës së Presidentit, Albulena Haxhiu.
Në sallën plenare nuk ishin të pranishëm deputetët e PDK-së, ndërsa morën pjesë deputetët e Lëvizjes Vetëvendosje dhe të Listës Serbe. Ndërsa, po paraditen e sotme, Kuvendi i Kosovës u konstituua pas zgjedhjes së nënkryetarëve.
Me votimin e sotëm, Qeveria e re e Kosovës nis zyrtarisht punën, ndërsa Kurti do të jetë për herë të katërt kryeministër i vendit./ZËRI
U mandatua për krijimin e qeverisë së re, Albin Kurti prezanton EMRATpër kabinetin e ri (VIDEO)
KOSOVË- Kryetari i Lëvizjes Vetëvendosje, Albin Kurti, mandatari për Qeverinë e re, ka prezantuar programin dhe kabinetin qeveritar.
Kabineti i ri do të ketë në krye të Punëve të Jashtme, Glauk Konjufcën, i cili po u ashtu u propozua edhe zëvendëskryeministër i parë. Donika Gërvalla zëvendëskryeministre e dytë dhe ministre e Drejtësisë, ndërsa Arben Vitia u rikthye në krye të Ministrisë së Shëndetësisë.
Lista e kabinetit të propozuar nga Kurti:
Zëvendëskryeministër i parë dhe ministër i Punëve të Jashtme dhe Diasporës- Glauk Konjufca
Zëvendëskryeministre e dytë dhe ministre e Drejtësisë- Donika Gërvalla
Zëvendëskryeministër i tretë për Çështje të Pakicave dhe Bashkëpunim, Fikrim Damka
Ministër i Financave- Hekuran Murati
Ministër për Punë, Familje dhe Vlerat e Luftës Çlirimtare- Andin Hoti
Ministër i Mbrojtjes- Ejup Maqedonci
Ministër i Punëve të Brendshme- Xhelal Sveçla
Ministër i Digjitalizimit dhe Administratës Publike- Lulzon Jagxhiu
Ministër i Shëndetësisë- Arben Vitia
Ministër i Arsimit dhe Shkencës- Hajrulla Çeku
Ministër i Kulturës dhe Turizmit- Saranda Bogujevci
Ministër i Administrimit të Pushtetit Lokal- Elbert Krasniqi
Ministër i Sportit dhe Rinisë- Blerim Gashani
Ministre e Mjedisit dhe Planifikimit Hapësinor- Fitore Pacolli
Ministër i Bujqësisë, Pylltarisë dhe Zhvillimit Rural- Armend Muja
Ministër i Infrastrukturës dhe Transportit- Dimal Basha
Ministre e Industrisë, Ndërmarrësisë, Tregtisë dhe Inovacionit- Mimoza Kusari
Ministre e Ekonomisë- Artane Rizvanolli
Ministër për Komunitete dhe Kthim- Nenad Rashiq
Ministër për Zhvillim Rajonal- Rasim Demiri./ZËRI
Kurti mandatohet për formimin e Qeverisë së Kosovës, Kuvendi mblidhet në seancë të jashtëzakonshme
KOSOVË- Kuvendi i Kosovës është mbledhur një seancë të jashtëzakonshme plenare, ku në rend dite është zgjedhja e Qeverisë së Republikës së Kosovës. Në sallën plenare janë të pranishëm deputetët e Lëvizjes Vetëvendosje dhe të Listës Serbe, ndërsa nuk janë të pranishëm deputetët e PDK-së.
Seanca vjen pasi Kuvendi u konstitua gjatë paradites së sotme pas zgjedhjeve të nënkryetarëve të Kuvendit.
Ushtruesja e detyrës së presidentes, Albulena Haxhiu, mandatoi Albin Kurtin për formimin e Qeverisë së re, ndërsa lajmin e bëri të ditur në një postimn në rrjetin e saj social "Facebook".
“Në përputhje me Kushtetutën e Republikës së Kosovës dhe pas propozimit të Lëvizjes VETËVENDOSJE!, kam caktuar Albin Kurtin mandatar për formimin e Qeverisë së Republikës së Kosovës. Kurtit i uroj sukses në ushtrimin e përgjegjësive që burojnë nga besimi i qytetarëve, si dhe në formimin sa më të shpejtë të Qeverisë, në shërbim të Republikës së Kosovës dhe qytetarëve të saj”, ka shkruar Haxhiu.
Kurti duhet të paraqesë programin qeverisësë dhe përbërjen e kabinetit para Kuvendit. Më pas, do t'i nënshtrohen votimit të deputetëve në Kuvend. /ZËRI
Konstituohet Kuvendi i Kosovës, zgjidhen nënkryetarët
KOSOVË- Kuvendi i Republikës së Kosovës është konstituuar, duke i dhënë fund ngërçit politik prej javësh. Procesi i zgjedhjes së nënkryetarëve u mbyll sot pavarësisht bojkotit të Partisë Demokratike të Kosovës (PDK) dhe heqjes së kandidaturës së Vlora Çitakut për postin e nënkryetares.
Kandidati i Lidhjes Demokratike të Kosovës, Kujtim Shala, u zgjodh nënkryetar i Kuvendit me 75 vota pro. Emilia Rexhepi është zgjedhur nënkryetare e Kuvendit të Kosovës nga radhët e komuniteteve joserbe.
Nga radhët e komunitetit serb, nënkryetare është zgjedhur Tanja Vujoviç. Ndërkohë, kandidatët e tjerë nga komuniteti serb nuk arritën të marrin votat e nevojshme për t’u zgjedhur në postin e nënkryetarit të Kuvendit.
Pas përfundimit të votimeve, kryetarja e Kuvendit, Albulena Haxhiu, deklaroi konstituimin e Kuvendit të Kosovës.
“Me këtë rast konstatoj se Kuvendi i Republikës së Kosovës konsiderohet i konstituuar”, tha Haxhiu.
PDK kishte njoftuar paraprakisht që nuk do të merrte pjesë në seancën e kësaj të diele. Ndërsa, gjatë seancës, PDK i dërgoi edhe një shkresë zyrtare Albulena Haxhiut, me të cilën pezulloi kandidaturën e Vlora Çitakut për nënkryetare të Kuvendit deri në vendimin e Gjykatës Kushtetuese.
Me konstituimin e Kuvendit hapet rruga për hapat e ardhshëm institucionalë. Ndërkohë që sdida e radhës mbetet procesi për zgjedhjen e kreut të shtetit./ZËRI
