PAKISTAN- Pakistani dënoi sulmet e urdhëruara ndaj Iranit nga Donald Trump, një ditë pasi Islamabadi tha se do ta nominonte presidentin e SHBA-së për Çmimin Nobel për Paqen.
Pakistani të dielën tha se vendimi i Trumpit për të bombarduar objektet bërthamore iraniane shkelte ligjin ndërkombëtar dhe se diplomacia ishte e vetmja mënyrë për të zgjidhur krizën e Iranit.
"Përshkallëzimi i paparë i tensionit dhe dhunës, për shkak të agresionit të vazhdueshëm kundër Iranit është thellësisht shqetësues. Çdo përshkallëzim i mëtejshëm i tensioneve do të ketë pasoja të rënda dëmtuese për rajonin dhe më gjerë", tha Ministria e Punëve të Jashtme e Pakistanit.
Gjithashtu të dielën, kryeministri i Pakistanit, Shehbaz Sharif, telefonoi Presidentin e Iranit, Masoud Pezeshkian, dhe "i përcolli dënimin e Pakistanit" të sulmeve të SHBA-së, tha një deklaratë nga udhëheqësi pakistanez.
Reagimi vjen disa orë pas përshkallëzimit të konfliktit Izrael-Iran, ku SHBA në orët e para të mëngjesit të së dielës (22 qershor 2025), lëshoi bombarduesit amerikanë B-2, dhe bomba shkatërruese, të cilat përdoren për herë të parë nga ana e SHBA-ve./ZËRI
