VIDEO/ MAKTHI në aeroporte vazhdon, radhë të gjata në Bergamo, shqiptarët diskriminohen nga pala italiane

Foto ilustruese

TIRANË- Denoncimet e qytetarëve "vërshojnë" por linjat ajrore nuk po jepin asnjë sinjal reflektimi. Edhe kjo mbrëmje ka qenë një "makth" për qindra qytetarë të cilët janë bllokuar në aeroportin e Bergamos pas nisjes nga Tirana me dy linjat e avionëve "Wizz Air" dhe "Ryanair".

Siç shihet edhe nga pamjet në videon e mëposhtme, të siguruar nga CNA, kanë ngelur të bllokuar për orë të tëra udhëtarët shqiptarë, pasi në dipozicion nga pala italiane është vënë vetëm një sportel. Gra, të moshuar dhe fëmijë me çanta në krahë ndodhen në radhë, ndërkohë që janë edhe të lodhur nga udhëtimi.

Skandali me linjat ajrore

Pak ditë më parë ZËRI solli shqetësimin e qindra qytetarëve që iu ishte shtyrë apo anuluar fluturimi nga Stambolli drejt Tiranës dhe e anasjellta, ndërsa kompania ‘Air Albania’ do të bënte një reagim të shkurtër vetëm gjatë orëve të mbrëmjes. Pa pranuar problemin në mënyrë të përgjithshme, kompania i lidhte vonesat vetëm me sulmin që i kishin bërë shpendët njërit prej avionëve, që më pas do të duhej të riparohej. As "Wizz Air" nuk mbetet mbrapa me skandalet sa i takon shërbimeve ndaj udhëtarëve shqiptarë. Jo më larg se një ditë më parë, 150 pasagjerë që duhet të ktheheshin me kompaninë WIZZ AIR në Tiranë, prej disa orësh u lanë në mëshirë të fatit në aeroportin e Pragës. Qytetarët e kanë ngritur shqetësimin e tyre pranë redaksisë së ZËRIT, ndërsa u ankuan se nuk iu është dhënë asnjë përgjigje nga kompania për vonesën, dhe për kohën e mbërritjes më Tiranë. ZËRI raportoi dhe rastin e këngëtarit Luiz Ejlli, fluturimi i të cilit nga Londra ishte devijuar për në Shkup, për shkak se avioni i WIZZ AIR nuk kishte mundur që të ulej për në Rinas. 

Për t'i shkuar deri në fund problemit që qytetarët kanë hasur, redaksia e ZËRI arriti të kontaktonte me Autoritetin e Aviacionit Civil i cili pranoi Wizz Air është operatori ajror me fluksin më të madh të fluturimeve, por edhe me numrin më të madh të anulimeve të kryera. Sipas Autoritetit të Aviacionit Civil, shkaku kryesor i vonesave ndodh për arsye të vonesave nga një fluturim i mëparshëm, efekti domino. Ky efekt, sipas AAC ka dhënë pasoja në numrin më të lartë të vonesave tek ky operator, e vlerësuar me 7928 fluturime të kryera nga kjo kompani për vitin 2023, 34 prej të cilave janë anuluar./ZËRI

Në përputhje me standarded JTI