TIRANË- Media prestigjioze franceze “Le Monde” i ka kushtuar vëmendje zhvillimeve të fundit në Shqipëri, duke raportuar për hetimin ndaj ish-drejtueses së SHISH, Vlora Hyseni.
Sipas medias franceze, Hyseni u dorëzua të martën, më 22 shtator, pas lëshimit të një urdhër-arresti nga SPAK dhe u vendos në arrest shtëpie, ndërsa hetimi lidhet me dyshime për korrupsion dhe rrjedhje të informacionit konfidencial.
Media franceze thekson se qeveria e kryeministrit Rama është tronditur tashmë nga disa hetime për korrupsion që synojnë zyrtarë të lartë.
"Kreu i shërbimeve të inteligjencës së Shqipërisë, Vlora Hyseni, u dorëzua te autoritetet të martën, më 22 shtator, pasi një urdhër arresti u lëshua nga Prokuroria Speciale kundër Korrupsionit dhe Krimit të Organizuar (SPAK). Ajo u pezullua nga detyrat e saj dhe u vu në arrest shtëpiak si pjesë e një hetimi për korrupsion. Ish-kreu i Policisë së Shtetit, Ilir Proda, i cili u shkarkua më parë këtë vit, u paraqit gjithashtu në gjykatë të martën në lidhje me të njëjtin rast, dhe shtëpia e tij u kontrollua, tha zyra e prokurorit kundër korrupsionit në një deklaratë.
Kjo aferë është një pengesë e mëtejshme për qeverinë e kryeministrit socialist Edi Rama, e cila tashmë është tronditur nga disa hetime për korrupsion që synojnë zyrtarë të lartë. Nëse përfshirja e Vlora Hysenit konfirmohet, kjo do të përbënte “krizën më serioze të sigurisë kombëtare në historinë e vendit“, sipas medias Balkan Insight.
Vlora Hyseni ka drejtuar Shërbimin Informativ Shtetëror të Shqipërisë (SHISH), institucionin më të rëndësishëm të sigurisë kombëtare në vend, që nga viti 2023. Ajo dyshohet për rrjedhje informacioni konfidencial në skandalin e korrupsionit të lidhur me Agjencinë Kombëtare për Shoqërinë e Informacionit (Akshi).
Kjo agjenci koordinon zhvillimin e sistemeve shtetërore të informacionit, procedurat e dixhitalizimit dhe menaxhon portalin shtetëror të shërbimeve publike, e-Albania.", shkruan "Le Monde".
Hetimi ndaj drejtueses së SHISH, Vlora Hyseni, ka marrë jehonë edhe në mediat ndërkombëtare. Agjencia prestigjioze Reuters, si dhe media të tjera italiane e greke, kanë raportuar zhvillimet e fundit lidhur me masën e “arrestit në shtëpi” ndaj Hysenit, duke i kushtuar vëmendje hetimit për dyshimet për korrupsion dhe rrjedhje të informacionit sekre tte Ergys Agasi, teksa ky i fundit ndodhej në arrati./ZËRI
