VLORË- Tashmë Policia e Vlorës ka një emër për ekzekutimin e Kristjan Markut alias Kristjan Bardhit në Novoselë. Pas hetimeve, 36-vjeçari Erald Cenaj nga Kukësi është arrestuar pasi akuzohet se ai ka siguruar automjetin për vrasjen e 30-vjeçarit. Gjithashtu autoritetet bëjnë me dije se janë sekuestruar prova materiale që do t’i shërbejnë hetimeve për zbardhjen e plotë të ngjarjes.
“Veprime të thelluara hetimore, bazuar edhe në inteligjencën informative, për zbardhjen e vrasjes së ndodhur më 13 janar 2025, identifikimin, lokalizimin, kapjen dhe arrestimin e autorit/ëve. Siguroi automjetin e përdorur për vrasjen e shtetasit Kristian Marku alias Kristian Bardhi, ndalohet 36-vjeçari me origjinë nga Kukësi.
Në vijim të veprimeve intensive nga specialistët e Sektorit për Hetimin e Krimeve të Rënda në DVP Vlorë, u bë ndalimi i shtetasit: E. C., 36 vjeç, lindur dhe banues në Kukës, i dyshuar për veprën penale “Sigurimi i kushteve dhe mjeteve materiale për të kryer vrasje”.
Nga tërësia e veprimeve hetimore të kryera deri tani nga specialistët për Hetimin e Krimeve të Rënda në DVP Vlorë, nën drejtimin e prokurorit të çështjes, u arrit të dokumentohej se automjeti i përdorur nga autori/ët për vrasjen e shtetasit Kristian Marku alias Kristian Bardhi është siguruar nga shtetasi E. C., lindur dhe banues në qytetin e Kukësit. Njëkohësisht, gjatë periudhës hetimore janë kryer veprime dhe janë sekuestruar prova që i shërbejnë hetimit me qëllim zbardhjen e ngjarjes. Në bashkëpunim të ngushtë me Departamentin e Policisë Kriminale në Drejtorinë e Përgjithshme të Policisë së Shtetit dhe Prokurorinë e Juridiksionit të Përgjithshëm Vlorë, vijojnë veprimet e thelluara hetimore për zbardhjen e plotë të ngjarjes, identifikimin dhe kapjen e autorit/ëve”, njofton Policia.
Nga të dhënat që janë zbuluar deri më tani është mësuar se autorët e vrasjes ia kanë dalë që të largohen nga vendi. Fillimisht drejt Kosovës, por nuk dihet se cili ka qenë destinacioni i tyre final. Megjithatë nuk përjashtohet mundësia që të kenë qëndruar në Kosovë. Por, kjo pritet që të mësohet me arrestimin e 36-vjeçarit.
Sa i përket dinamikës së ngjarjes, shënjestra është ndjekur nga dy makina, njëra që është përdorur nga vrasësit në momentin që kanë kryer krimin, ndërsa tjetra ka larguar autorët nga vendi i ngjarjes. Hetuesit kanë zbuluar se mjeti i dytë është nisur nga Fieri për të Vlorë, ka marrë ekzekutorët dhe më pas janë larguar nga vendi i ngjarjes.
Gjithashtu, grupi hetimor po punon të zbulojë edhe arsyen se përse Marku po shkonte drejt Vlorës. Natën e vrasjes, ai është nisur nga Tirana me një mjet të marrë me qera, detaj që tregon se autorët e kanë ndjekur edhe në kryeqytet dhe i kanë vëzhguar të gjitha lëvizjet e tij. Por se ku do të shkonte është e paqartë, për më tepër kur xhaxhai i tij para Policisë tha se nipi ruhej për shkak të probleme që kishte dhe lëvizte vetëm kur ishte i sigurtë. Ndaj nuk përjashtohet edhe mundësia që i riu të jetë thirrur nga dikush për t'u nxjerrë në pritë, megjithatë këtë version mund ta konfirmojë vetëm Prokuroria.
Dyshimet janë se autorët janë 3 dhe mund të jenë nga Vlora, ose ekzekutorët kanë kërkuar ndihmë nga vendas të zonës që e njohin mirë territorin që të largohen pa u pikasur nga asnjë patrullë policie. Kjo pistë hetimore është ngritur për shkak të dinamikës së ngjarjes, nga vjedhja e targave të oficerit të policisë, e cila ndodhi natën që do të kryehej vrasja. Sipas grupit hetimor, nëse zbardhet vjedhja e targës, hetimi do të jetë më i lehtë për të zbardhur ngjarjen. Grupi hetimor shprehet se vrasja e kryer teksa automjetet është në ecje është bërë nga persona me eksperiencë. Policia e Vlorës po vijon të marrë persona në pyetje, ndërkohë kamerat janë duke u shqyrtuar edhe në bizneset që ndodhen në Njësinë Administrative Novoselë, për të parë nëse mjeti i autorëve ka qarkulluar në zonë.
Kristjan Marku, i njohur edhe me mbiemrin Bardhi është nipi i Martin Bardhit të vrarë në Rrëshen në Shtator të vitit 2023. Për këtë ngjarje u vu në pranga Martin Bardhi, ndërsa në kërkim u shpallën djali i tij, Enrik Bardhi dhe nipi Kristjan Marku, i cili tashmë është pjesë e listës së gjatë të viktimave të familjes Bardhi./ZËRI
