VLORË-30-vjeçari Kristjan Marku është vrarë sot, pranë një karburanti në zonën e Novoselës në Vlorë. I riu po udhëtonte me mjetin e tij, kur autorët i janë afruar dhe kanë qëlluar në ecje e sipër me breshëri plumbash duke i marrë jetën në vend. I ndjeri ishte një personazh i njohur për Policinë, pasi ishte i shpallur në kërkim për "vrasje me dashje të mbetur në tentativë" dhe "armëmbajtje pa leje".
Marku, i cili përdorte edhe mbiemrin Bardhi, dyshohet të jetë autor në ngjarjen e datës 26 mars 2023, rreth orës 19:00, ndodhur në Rrëshen të Mirditës. Dyshohet se ai është një nga personat që ka qëlluar në drejtim të Saimir Reçit. Për ngjarjen në mars të vitit 2023 ishte vendosur në pranga Martin Bardhi, ndërsa në kërkim ishin shpallur djali dhe nipi i të arrestuarit, Erind Videl alias Erind Bardhi dhe Kristjan Marku alias Kristi Bardhi.
Si ndodhi ngjarja?
Përplasja nisi mes dy të rinjve, Enrik Bardhi dhe Saimir Reçi, të cilët ishin konfliktuar fizikisht. Shkaku ishte një parakalim i gabuar me makinë. Por sherri nuk u shua me aq. Enrik Bardhi shkoi në banesë dhe mori armën e zjarrit për të qëlluar bashkëmoshatarin e tij. Bashkë me Enrikun, ka shkuar edhe i ati, Martin Bardhi dhe kushëriri i të riut, të cilët kanë qëlluar në drejtim të makinës së blinduar të Saimir Reçit. Ky i fundit, si pasojë e të shtënave, humbi kontrollin e mjetit dhe u përplas me bordurën e rrugës.
Por përplasja duket se nuk u la më aq! Në shtator të po atij viti, në kafenenë e qytetit u vra Martin Bardhi, vetëm pak muaj sapo kishte dalë nga burgu. Për ngjarjen u mor në pyetje Saimir Reçi, por ky i fundit mohoi se kishte lidhje me vrasjen. Familja Bardhi dhe Reçi njihen për armiqësitë me njëra- tjetrën. Për më tepër kur Martin Bardhi është përfolur edhe për përfshirjen në vrasjen e Kastriot Reçit me snajper në mes të qytetit të Rrëshenit./ZËRI
