TIRANË- Prokuroria e Korçës ka shpallur moskompetencë për hetimet rreth vdekjes së 12-vjeçarit nga Maliqi. Sipas organit të akuzës, ngjarja ka ndodhur në kryeqytet dhe ia ka kaluar dosjen për vazhdimësi Prokurorisë së Tiranës. Në dosje janë administruar kartelat mjekësore të 12-vjeçarit, në spitalin e Korçës dhe në Qendrën Spitalore Universitare “Nënë Tereza”, si dhe dëshmia e mjekëve.
I mituri nga fshati Pocestë i bashkisë së Maliqit pasi ishte ndjerë keq, ishte dërguar për t'u trajtuar pranë spitalit rajonal të Korçës, por duke qenë se gjendja e tij shëndetësore ishte rënduar, e sollën në Tiranë. Pas pretendimeve të familjarëve, ka pasur edhe një reagim nga QSUT. Sipas tyre, djali ndërroi jetë në Shërbimin e Terapisë Intensive Pediatrike. Pra, jo në pavionin ku pretendojnë familjarët. Ndërsa po sipas tyre, pas ekzaminimeve të kryera, pacienti është diagnostikuar me miokardit akut./ZËRI
