TIRANË- Sekretari i Përgjithshëm i Partisë së Lirisë, Tedi Blushi kërkon largimin e atletes Luiza Gega nga Forcat e Armatosura, ku edhe mban gradën kolonele. Blushi ka nxjerrë një foto të Gegës, e cila mori dje pjesë në protestën që u mbajt para godinës së SPAK për arrestimin e kryebashkiakut Erion Veliaj. Sipas tij, sportistja ka shkelur hapur “Ligjin për disiplinën ushtarake”, i cili e konsideron pjesëmarrjen në takime të tilla si shkelje shumë të rëndë.
"Kolonelja Luiza Gega, me pjesëmarrjen dhe qëndrimin e saj publik në protestën e organizuar në mbështetje të Kryehajdutit të Tiranës, Erion Veliaj, ndaj të cilit është vendosur masa e arrestit me burg, ka shkelur hapur “Ligjin për disiplinën ushtarake”, që ia ndalon rreptësisht të jetë e angazhuar në grumbullime politike dhe në përkrahje publike të një anëtari partie. Për çdo ushtarak ligji është i qartë! Shtabi i Përgjithshëm i FA të respektojë ligjin dhe të reagojë ndaj kësaj paligjshmërie skandaloze dhe të konsumuar botërisht! Kampionët e sportit janë të lirë të mbështesin çdo parti, madje edhe të flenë poshtë dritares së qelisë së Erion Veliaj e të brohorasin për megavjedhjet e tij, por nuk mund të jenë më pjesë e Forcave të Armatosura të Republikës së Shqipërisë. Është e qartë se Kolonele Luiza Gega e ka bërë zgjedhjen e saj dhe për të betimi tek zyra e Erion Veliajt është më i shenjtë dhe shumë më i rëndësishem se sa betimi për Flamurin Kombëtar, të larë me gjakun e Dëshmorëve dhe ushtarakëve patriotë,"-shkruan Blushi.
Por, megjithatë, Gega nuk ishte e vetmja që mori pjesë në tubimin e djeshëm. Bashkë me të ishin edhe sportistë dhe artistë të tjerë, bashkë me atltetin Izmir Smajlajn, i cili gjithashtu është pjesë e Forcave të Armatosura./ZËRI
