TIRANË- Gjykata e Elbasanit ka rrëzuar kërkesën e producentit Petri Bozo për ndryshimin e masës së sigurisë arrest në shtëpi duke mos i dhënë mundësinë të udhëtojë drejt Tajlandës për eventin 'Miss Globe'.
Bozo kishte kërkuar zbutjen e masës në detyrim paraqitjeje, ndërsa në mbështetje të kërkesës kishte paraqitur edhe ftesa për pjesëmarrjen e tij në event që sipas dokumenteve do të zhvillohej nga 24 tetori deri më 6 nëntor.
Gjyqtarja Suela Lika ka vlerësuar se nuk ekzistojnë kushtet dhe rrethanat për ndryshimin e masës së sigurisë, duke lënë në fuqi arrestin në shtëpi.
Petri Bozo ndodhet nën këtë masë pas ngjarjes së 25 majit kur përplasi për vdekje një 7 vjeçar në aksin nacional Elbasan-Librazhd.
Ngjarja ka ndodhur teksa i mituri ishte duke shkuar në shkollë. Shkolla 9-vjeçare “Sulejman Rranci”, ndodhet në buzë të aksit nacional Elbasan-Librazhd./ZËRI
