HIMARË- Diga e hidrocentralit në Bunec, në Lukovë është çarë këtë mesditë duke shkaktuar përmbytje dhe bllokim të rrugës. Për shkak të vërshimit të ujit janë prekur 12 biznese dhe, ku janë shkaktuar dëme materiale. Rruga nacionale Lukovë-Bunec është bllokuar dhe kalohet vetëm nga automjetetet e rënda.
Në zonë ka shkuar dhe kreu i bashkisë së Himarës, Vangjel Tavo. Po ashtu edhe Policia dhe Emergjencat Civile ndodhen në vendngjarje, për të siguruar evakuimin e qytetarëve, të cilët mund të jenë në rrezik. Autoritetet apelojnë qytetarët të shmangnin lëvizjet dhe të raportojnë për çdo rast emergjence dhe problematike.
“Rreth orës 12:26 të ditës së sotme ujëmbledhësi i Sasajt, në Bunec, bashkia Himarë, i cili është ndërtuar në vitin 2010 ka pësuar shembje. Në momentin e shembjes ka patur rreth 15.000 metra kub ujë. Si pasojë ka prezencë uji dhe balte në 12 biznese në Bunec dhe është dëmtuar baza ushqimore e blektorisë ne 2 familje.
Nuk ka probleme në njerëz.
Aktualisht është bërë i kalueshëm aksi i rrugës nacionale Bunec-Piqeras dhe po punohet nga strukturat e bashkisë Himarë për pastrimin e baltës. Situata po ndiqet nga prefektura Vlorë dhe strukturat e emergjencave civile të bashkisë Himarë.
Ministria e Mbrojtjes, Agjencia Kombëtare e Mbrojtjes Civile dhe Forcat e Armatosura janë përherë në gatishmëri, në ndihmë të komunitetit”, njofton Mbrojtja Civile.
Deri më tani nuk dihen shkaqet e çarjes së digës, por furnizimi me ujë është ndërprerë në burimin e lumit të Kalasë. /ZËRI
