BULQIZË- Një vrajse me armë zjarri ka ndodhur mesditën e sotme në pyllin e fshatit Tërnovë e Vogël në Bulqizë. Vasil Kamberi, 36 vjeç ka humbur jetën, pasi është qëlluar me armë gjahu nga i afërmi i tij. Ngjarja ka ndodhur në një zonë pyjore, ndërsa 36-vjeçari ka humbur jetën në helikopter ndërsa po transportohej drejt spitalit. Autori, Flamur Kamberi është shoqëruar në Komisariat.
Mësohet se viktima dhe 34-vjeçari jam djem xhaxhallarësh. 36-vjeçari, i cili u qëllua me armë zjarri në pyllin e fshatit Tërnovë e Vogël në Bulqizë, ishte kryetar fshati. Policia po verifikon nëse ngjarja është aksidentale apo e qëllimshme, pasi ka qenë vetë personi i arrestuar që ka lajmëruar autoritetet.
Njoftimi i policisë:
Me datë 16.01.2025, rreth orës 12.00, është marrë njofim se në pyllin e fshatit Tërnovë e Vogël në Bulqizë, është plagosur me armë gjahu (çifte), shtetasi V.K., 36 vjeç, i cili si pasojë e plagëve të marra, ka humbur jetën gjatë transportimit me helikopter për në spital.
Nga veprimet e para hetimore, ka rezultuar se autori i dyshuar i ngjarjes është shtetasi F.K., 34 vjeç (i afërm me shtetasin V.K.), i cili është shoqëruar në Komisariatin e Policisë për veprime të mëtejshme.
Grupi hetimor nën drejtimin e Prokurorisë vijon veprimet në vendngjarje për sqarimin dhe dokumentimin e plotë ligjor të kësaj ngjarjeje./ZËRI
