SHKODËR- Këngëtari Ademir Fresku u godit me thikë dy ditë më parë nga tregtari i fruta-perimeve, Gjergj Dardha. Shkaku i përplasjes është zbuluar nga këngëtari 30-vjeçar, i cili ka dhënë dëshminë e tij nga shtrati i spitalit të Shkodrës. Në rrëfimin e tij para uniformave blu, Fresku tha se personi që e kishte plagosur besdiste punonjësit e lokalit në pronësi të tij. Ndaj edhe kishte nisur përplasja me të, pasi i kishte kërkuar disa herë që të mos i shkonte në lokal.
Por në debatin e fundit, Dardha e qëlloi me thikë pas shpinë, por pa pasoja të rënda. Madje këngëtari tregon se ka shkuar vetë në spital për të marrë ndihmë mjekësore.
“Nuk doja të isha pjesë e këtyre gjërave. Është bërë më e madh se ç’duhet. Jam goditur pas shpine por shpresoj që gjithçka të zgjidhet nga shteti. Me autorin njiheshim, mundohesha t’i njihesha e ti respektoja të tërë. E kam takuar 3-4 herë. I ka bezdisur disa herë punonjësit e lokalit tim, por nuk i kam hyrë shumë në detaje. I kisha thënë në mënyrën më qytetare të mundshme që të mos vinte më në lokalin tim. Familjarët e autorit nuk më kanë kontaktuar. Unë kam 4-5 plagë me thikë në trup. Ka qenë një sulm në pabesi, nuk e kam vënë re. Në spital shkova vetë, mora makinën dhe shkova të merrja ndihmën mjekësore sepse nuk e dija se çfarë kisha pësuar saktësisht,”- tha ai.
Edhe nga të dhënat që ka bërë me dije deri më tani Policia, Gjergj Dardha, i cili shiste fruta perime, kishte shkuar disa herë i dehur në lokal. Derisa pronari Ademir Fresku kishte debatuar me të, derisa tregtari menjëherë ka nxjerrë thikën duke e goditur disa herë 30-vjeçarin. Menjëherë pas ngjarjes, Dardha u vendos në pranga./ZËRI
