TIRANË- Teksa pritet të mblidhet këtë javë komisioni i reformës zgjedhore, dy bashkëkryetarët e komisionit Damian Gjiknuri dhe Enkelejd Alibeaj i kane dërguar dhe letër zyrtare OSBE për të atashuar përfaqësuesit e ODIHR pranë ekspertëve të komisionit. Në letrën e përbashkët, Alibeaj dhe Gjiknuri kërkojnë që ODIHR të vendosë në dispozicionë ekspertë të fushës, të cilët do të mund ti asistojnë komisionit në gjatë punës për reformën zgjedhore. Kërkesë kjo që vjen pas deklaratës së OSBE, për t'i asistuar gjatë punimeve.
Letra e plotë:
Na lejoni fillimisht të shprehim falenderimet dhe mirënjohjen e thellë për kontributin që OSBE/ODIHR ka dhënë gjatë këtyre viteve për zhvillimin dhe konsolidimin e demokracisë në Shqipëri dhe në mënyrë të veçantë në një prej themeleve të rëndësishme të saj, siç janë zgjedhjet. Me vendimin nr. 12, datë 10.02.2022, të ndryshuar, Kuvendi i Shqipërisë ka miratuar ngritjen e Komisionit të Posaçëm Parlamentar për realizimin e Reformës Zgjedhore. Komisioni ka për detyrë hartimin e ndryshimeve legjislative për reformën zgjedhore, në veçanti trajtimin e rekomandimeve të raporteve të OSBE/ODIHR-it për zgjedhjet e 25 Prillit 2021 dhe për zgjedhjet e mëparshme të patrajtuara, rekomandimeve të institucioneve përgjegjëse për zgjedhjet, të partive politike parlamentare dhe organizatave jofitimprurëse.
Për këtë arsye, ashtu siç ramë dakord me përfaqësues të OSBE/ODIHR-it në takimin e zhvilluar në Dhjetor 2023, ku diskutuam punën e Komisionit dhe nevojën që pranë Komisionit të vendoset në dispozicion ekspertiza e ODIHR-it, kemi kënaqësinë që në emër të Komisionit të Posaçëm Parlamentar për Realizimin e Reformës Zgjedhore t'ju paraqesim kërkesën për të kontribuuar me ekspertë të fushës së zgjedhjeve, të ODIHR-it, për të asistuar punën e këtij Komisioni.
Mënyra e komunikimit të ekspertëve të caktuar nga ju, me Komisionin e Reformës Zgjedhore, mund të përcaktohet në vijim të bashkëpunimit tonë të mëtejshëm.
Duke ju falenderuar paraprakisht për gatishmërinë dhe bashkëpunimin tuaj,
Sinqerisht,
BASHKËKRYETARËT
Damian GJIKNURI
Enkelejd ALIBEAJ
Por, dokumenti edhe pse ka firmat e dy deputetëve, nuk e ka një datë, ndaj edhe nuk dihet se kur është nënshkruar./ZËRI
