SHBA- Ka filluar një seancë speciale e Këshillit të Sigurimit të OKB-së për luftën në Ukrainë. Këshilli i Sigurimit, i moderuar sot nga kryeministri Edi Rama ka nisur një debat për Ukrainën. Por që në fillim të takimit, Vasily Nebenzya, ambasadori i Rusisë në OKB, sfidoi kryeministrin shqiptar, Edi Rama duke i kërkuar llogari për të shpjeguar se mbi cilën bazë kishte vendosur t'i jepte fjalën presidenti ukrainas, Volodymyr Zelenskyy. Kjo pasi Ukraina nuk është anëtare e këshillit.
Rama u përgjigj duke thënë se dhënia e fjalës fillimisht Zelenskyy-t do t'i lejojë anëtarët e këshillit t'i përgjigjen vërejtjeve të tij: Ata që kanë një interes të drejtpërdrejtë në rezultatin e çështjes në shqyrtim mund të flasin para anëtarëve të këshillit nëse është e nevojshme. Pas kryeministrit Edi Rama fjalën e mori Presidenti i Ukrainës Volodymyr Zelenskyy. Gjatë fjalës së tij lideri ukrainas tha se Këshilli i Sigurisë duhet të jetë "plotësisht i përgjegjshëm" ndaj vendeve anëtare të OKB-së dhe se anëtarët e tij të përhershëm duhet të pasqyrojnë "realitetet aktuale". Zelenskyy tha se Ukraina e konsideron "të padrejtë" kur miliarda njerëz nuk kanë një përfaqësues të përhershëm në Këshillin e Sigurisë, ndërsa Rusia ka. Po ashtu, ai bëri thirrje thirrje që Asamblesë së Përgjithshme të OKB-së t'i jepet fuqi për të kapërcyer të drejtën e vetos të mbajtur nga Rusia, duke e quajtur atë një "hap të domosdoshëm. Sot gjithashtu, Zelenskyy i paraqiti Këshillit të Sigurimit planin 10-pikësh të Ukrainës për t’i dhënë fund luftës dhe ftoi vendet e tjera që t’i bashkoheshin nismës së tij.
"Është e pamundur të ndalet lufta, sepse të gjitha përpjekjet janë vënë në veton nga agresori. ëto ditë, në asamblenë e përgjithshme, dëgjojmë shumë shpesh pabarazinë botërore. Pabarazia përmendet nga kombe të ndryshme, si më të mëdha ashtu edhe më të vogla. Kjo është pikërisht pabarazia që e bën OKB-në joefektive. E di që OKB-ja është e aftë për më shumë. Unë jam i bindur se Karta e OKB-së mund të funksionojë. për hir të paqes dhe sigurisë globale. Megjithatë, që kjo të ndodhë, diskutimet dhe projektet shumëvjeçare për reformën e OKB-së duhet të përkthehen në një proces të zbatueshëm të reformës së OKB-së dhe nuk duhet të ketë të bëjë vetëm me përfaqësimin këtu në këshillin e sigurisë, me përdorimin e të drejtës së vetos,"-tha Volodymyr Zelenskyy.
Por Nebenzya, i cili kishte shumë për të thënë në fillim të seancës së Këshillit të Sigurimit të OKB-së, nuk nxorri asnjë zë gjatë kohës që fliste Zelenskyy, e gjithë kohës u fokusua tek telefoni i tij.
Ndërkohë që debati vazhdon, paralelisht, presidenti turk Rexhep Tajip Erdogan po takohet me kryeministrin grek, Kyriakos Mistotakis, ndërsa presidenti i SHBA, Joe Biden po diskuton me kreun e qeverisë izraelite, Benjamin Netanjahu. Pritet edhe takim mes Zelenskyy-t dhe kryediplomatit rus, Sergei Lavrov. Nga ana tjetër, Sekretari i Përgjithshëm i OKB-së Antonio Guterres do të mbledhë Samitin e Ambicieve Klimatike për të përshpejtuar politikën e ndryshimeve klimatike, drejtësinë klimatike dhe dekarbonizimin përmes përpjekjeve kolektive.
Çfarë ndodhi në ditën e parë?
UNGA filloi me një fjalim të ashpër nga Guterres, i fokusuar në tensionet gjeopolitike të nxitura kryesisht nga lufta në Ukrainë. Dita e parë pati fjalime nga liderë të profilit të lartë, duke përfshirë Biden, presidentin turk Rexhep Tajip Erdogan, Zelenskyy-n dhe presidentin iranian Ebrahim Raisi. Pyetjet rreth zhvillimit ndërkombëtar dhe si të trajtohen ndryshimet klimatike do të jenë gjithashtu në krye të agjendës. OKB-ja paraqet një mundësi unike për krerët e shteteve dhe krerët e qeverive të botës që të takohen në një vend. Ajo është përshkruar si një ngjarje "takim diplomatik me shpejtësi". Rezultatet më domethënëse nga OKB-ja shpesh vijnë nga takimet rpivate ndërmjet liderëve ndërkombëtarë./Zëri.ai
