TIRANË-Kryeministri Edi Rama nga një konferencë për shtyp pas mbledhjes së qeverisë, përshëndeti hetimin e SPAK për të hetuar origjinën e pronës ku do të kryhen ndërtimet në Zvërnec. SPAK sot zhbllokoi llogaritë bankare të kompanisë "Albania Land Development" nga Katari e angazhuar për projektin e Zvërnecit. Lidhur me këtë zhvillim, Rama tha se është një lajm pozitiv, ku sipas tij mund t'i japë një përgjigje përfundimtare dhe pretendentëve të tjerë të pronësisë.
Edi Rama: Besoj që i dëgjuat vendimet e qeverisë sot, por kam dalë për një arsye tjetër që nuk ka të bëjë me mbledhjen e qeverisë, por ka të bëjë me një zhvillim që unë e konsideroj shumë pozitiv lidhur me procesin e verifikimit të transaksionit për blerjen e tokës në Zvërnec. Që do të thotë, me sqarimin e plotë dhe përfundimtar të origjinës së fondeve të kaluara përmes bankës dhe me çlirimin përfundimtar të investitorëve, të cilët tanimë janë edhe pronarë. Unë e konsideroj shumë pozitive që SPAK-u ka vendosur t’i mbajë të ngrira fondet pa i lënë të kalojnë te shitësit, për të cilët ka një proces hetimor. Kjo, në këndvështrimin tim, është shumë pozitive për këdo që pretendon pronë në atë territor, sepse tanimë çështja e origjinës së pronës është një çështje që do të mbulohet nga një hetim tërësisht i pavarur dhe profesional përmes SPAK-ut dhe, në të dyja rastet, rezultati do të jetë i padiskutueshëm nga pikëpamja ligjore, ndërsa nga pikëpamja e pretendimeve do t’i japë fund çdo spekulimi e manipulimi.
Më 2 qershor SPAK vendosi nën sekuestro llogaritë bankare të kompanisë “Albania Land Development”, në kuadër të një hetimi për një skemë të dyshuar të tjetërsimit të pronave në zonën e Zvërnecit. “Albania Land Development” ka blerë tokat mbi të cilat do të realizohet projekti. Këto prona fillimisht ishin në pronësi të Redi Strugës, i cili pas shitjes u emërua një nga tre administratorët e kompanisë, por me të drejtë të kufizuar për firmë.
Sot, një ditë më pas, Prokuroria e Posaçme liroi sekuestrot e llogarive bankare të vëllezërve nga Katari, Ramez dhe Mohamad Al-Khayyat. Hetimet dyshohet se lidhen me një mekanizëm të mundshëm për kalimin e pronave shtetërore në duar private.
