TIRANË-Ministri i Brendshëm Besfort Lamallari ka ndarë në rrjete sociale dëmet që kanë shkaktuar protestuesit mbrëmë (5 korrik) tek komisariati numër 3 në Tiranë. Ministri ka dënuar aktet e dhunës, që sipas tij janë përshkallëzuar nga rrjetet sociale dhe nga aktorë të ndryshëm publikë. Lamallari shprehet se disa persona përhapin dezinformata, si “moralistë”, “kritikë gjithologë” dhe “revolucionarë delirantë”.
Besfort Lamallari: Një shembull konkret i ciklit të dhunës që nis me urrejtjen e nxitur nga një deklaratë e papërgjegjshme në mëngjes ‘për prova dhune dhe gjaku’ por që u ndryshua në drekë, iu hodh ‘benzinë’ pasdite nga moralistët, kritikët gjithollogë dhe delirantët revolucionarë si ushqim për rrjetin përplot me profile të hapura rishtazi dhe shumëfishuar nga zyra gjetkë, ndihmuar nga algoritmi dhe shoqëruar në fund me një pjatë të helmatisur simbolikash ataviste të një kulture që nuk ka vend në Shqipërinë evropiane. Jemi më pranë se kurrë përmbushjes së aspiratës kombëtare #Shqipëria2030 dhe asgjë nuk na ndal!
Mbrëmjen e 4 korrikut pas tubimit paqësor në bulevardin “Dëshmorët e Kombit”, protesta u zhvendos në Komisariatin numër 3 të kryeqytetit. Gjatë qëndrimit para komisariatit, situata u tensionua pasi një prej protestuesve, i maskuar ka goditur me shkop xhamat e godinës, duke i thyer ato./ZËRI
