SHBA- Eric Wendt është ambasadori i ri i Shteteve të Bashkuara në Shqipëri. Pas konfirmimit, Ambasada e SHBA-së në Tiranë ka uruar Wendt për detyrën e re dhe duke shprehur kënaqësinë për ardhjen e tij në Shqipëri.
Përmes një postimi në rrjete sociale, Ambasada ka deklaruar se e pret me kënaqësi ambasadorin e ri në Tiranë, duke theksuar se do të mbështesë vizionin e Presidentit Trump për siguri të përbashkët.
“U konfirmua! Urime Gjenerallejtënantit (në pension) Eric Wendt për rolin e tij të ri si Ambasadori i ardhshëm i Shteteve të Bashkuara në Shqipëri! Presim me kënaqësi Ambasadorin e emëruar Ëendt në Tiranë, nga ku do të mbështesë vizionin e Presidentit Trump për siguri të përbashkët, një NATO më të fortë dhe marrëveshje të drejta për bizneset amerikane”, shkruan ambasada amerikane.
Pak ditë më parë, Senati i SHBA-së miratoi kandidaturën e tij me 50 vota pro dhe 44 kundër, pasi ai kishte marrë më herët mbështetjen e Komitetit për Marrëdhëniet me Jashtë.
Pas këtij hapi procedurial, pritet që presidenti Donald Trump të firmosë emërimin e Wendt. Ky është edhe hapi i fundit drejt finalizimit të mandatit të tij si ambasador i SHBA-së në Shqipëri. Eric Wendt do ta marrë zyrtarisht detyrën pasi të dorëzojë letrat kredenciale te Presidenti i Republikës së Shqipërisë, Bajram Begaj.
Eric Wendt do të jetë pasuesi i ambasadores Yuri Kim, e cila përfundoi mandatin e saj në Shqipëri në vitin 2023. Që prej asaj kohe, Ambasada amerikane në Tiranë është drejtuar nga të ngarkuar me punë, ndërsa procesi për emërimin e një ambasadori të ri u zgjat për shkak të procedurave të konfirmimit në Senat.
Kush është Eric Wendt?
Sipas të dhënave të karrierës së tij, Eric P. Wendt është një oficer i lartë i ushtrisë amerikane në pension, me mbi 34 vite shërbim, pjesa më e madhe në forcat speciale “Green Beret”. Ai ka shërbyer gjithashtu si komandant i Komandës së Operacioneve Speciale të NATO-s, si dhe në pozicione të rëndësishme në Lindjen e Mesme dhe rajonin e Paqësorit.
Gjatë karrierës së tij, Wendt ka mbajtur detyra si koordinator sigurie i SHBA për Autoritetin Izraelito-Palestinez (2017–2019) dhe shef shtabi në Komandën e Paqësorit të SHBA. Ai është diplomuar në Universitetin e Kalifornisë, Santa Barbara dhe ka përfunduar studimet pasuniversitare në fushën e sigurisë kombëtare në Naval Postgraduate School. Ai flet disa gjuhë të huaja, përfshirë arabishten dhe koreanishten.
Wendt ishte propozuar më herët edhe për postin e ambasadorit në Katar gjatë mandatit të parë të Donald Trump, por kandidatura e tij nuk u konfirmua nga Senati./ZËRI
