Familja LALA/ Nga biznesi në politikë e fushën e krimit, dëshmia e të Luftar Reçit dhe përgjimet për ‘tërmetin’ e Dibrës
TIRANË- Ylard Lala 24 vjeç, banues në Tiranë, akuzohet për veprat penale "Organizimi ose ushtrimi i veprimtarive të lojërave të fatit në kundërshtim me ligjin", dhe "Vënia në dispozicion e lokaleve për lojëra të palejuara", parashikuar nga nenet 197 dhe 197 të Kodit Penal, pasi është vënë në pranga bashkë me nipin e demokratit Flamur Noka, Rexhep Noka. Dyshja u kapën në rrugën “Andon Zako Çajupi”, në lokalin që ishte në administrim të vetë Ylard Lalës, i cili është pjesë e Gradës së Republikës.
Por kush është familja Lala, nga kryefamiljari biznesmen, vajza deputete dhe djali gardist
Ymer Lala, një biznesmen kontrovers i lidhur ngushtë me politikën e jo vetëm, na sjell në mendje një sërë episodesh e akuzash që kanë të bëjnë me shit-blerjen e votave dhe krimin e organizuar.
Angazhimi i tij për shkak të miqësive me nivele të larta politike, daton shumë herët, por gjurmët e para të dukshme i ka lënë në vitin 2016, kur siç duket ka ndikuar shumë në fitoren e Partisë Socialiste në Bashkinë e Peshkopisë, por dhe në fitoren e Partisë për Drejtësi Integrim dhe Unitet, në zgjedhjet parlamentare të vitit 2017.
Ky ishte i njëjti vit kur vajza e tij, Reme Lala, u bë pjesë e Kuvendit të Shqipërisë, si deputete.
Akuzat e para publike u bënë nga kryetari i Bashkisë në vitin 2018, Muharrem Rama, emër i zgjedhur pas shkarkimit të Shukri Xhelilit për video-skandalin seksual.
Akuzat erdhën pas përplasjes fizike që u zhvillua gjatë një mbledhjeje të administratës në ambientet e Bashkisë së Peshkopisë për shkak të punësimeve. Në polici në atë kohë u shoqërua kryebashkiaku Rama, drejtori i burimeve njerëzore, Dritan Mataj dhe disa persona të tjerë.
Në verën e vitit 2019, Ymer Lala u bë pjesë e përgjimeve të gazetës “Bild” që u publikuan nga gazetari Peter Tiede dhe nxorrën në pah ndikimin e tij në zgjedhje. Në 10 audiopërgjime që vërtetonin krimin zgjedhor në Dibër, Ymer Lala rezultonte ‘koka’ e fushatës së Partisë Socialiste. Nga këto përgjime ka dalë dhe biseda me Damian Gjiknurin dhe ‘tërmeti’ i shkaktuar në Dibër me rezultatet në zgjedhje.
Në vitin 2020, në të gjitha mediat qarkulloi lajmi se Luftar Reçi, bashkëpunëtori i drejtësisë që zbardhi vrasjen e Klodian Saliut dhe Vajdin Lamajt, ishte tentuar të helmohej në qeli. Shkak u dyshua se ishte bërë dëshmia e fortë e tij që kishte zbardhur krime të grupeve kriminale që operonin në Tiranë e Durrës, por edhe fakti që kishte përmendur emrin e Ymer Lalës.
Luftar Reçi rrëfeu se Ymer Lala e kishte kontraktuar për të vrarë Maks Lalën, i cili më parë kishte qenë bashkëpunëtor i Ymer Lalës në trafikun e drogës.
Sipas të penduarit të drejtësisë, Ymer Lala kërkonte ta eliminonte Maks Lalën, pasi më parë e kishte pasur ‘ushtar’ dhe e kishte urdhëruar të kryente krime të ndryshme. Në momentin që Maks Lala ishte distancuar dhe kishte vijuar me trafikun e lëndëve narkotike në Maqedoninë e Veriut, Ymer Lala vendosi që ai të heshtte përgjithmonë.
Në këmbim të vrasjes së Maks Lalës, Ymer Lala i kishte ofruar Luftar Reçit eliminimin e një prej armiqve të tij.
Luftar Reçi tregoi se Maks Lala ishte vrarë dhe djegur më pas me benzinë, për të mos lënë asnjë gjurmë, por kishte lënë një fjalë tek familja e tij: Nëse më vrasin një ditë, e ka bërë Ymer Lala!
Sot Ymer alias Korab Lala vijon aktivitetin e tij pa i hyrë 'gjemb në këmbë'. Në zgjedhjet e pjesshme lokale të 6 marsit, kërkoi të kandidonte të bijën për kryetare bashkie në Dibër, pas largimit të Dionis Imerajt, që u vu nën hetim nga Prokuroria e Dibrës për dosjen 184, shit-blerjen e votave.
Por, kjo gjë nuk ndodhi.
Megjithatë, ‘shpërblimi’ nuk i ka munguar.
Reme Lala sot është drejtoreshë e Shërbimit Social Shtetëror, e ndërsa djali i Ymer Lalës, Ylard Lala, është bërë pjesë e Gardës së Republikës, pavarësisht se kriteri kryesor është mospërfshirja në vepra penale. Ushtrimi i veprimtarisë së lojërave të fatit, tregon të kundërtën.
"Asnjë mos të lëvizë"/ PAMJET- Momenti kur policia mësyn lokalin që administrohej nga djali i biznesmenit Ymer Lala
TIRANË- Policia e Shtetit ka ndarë për mediat pamjet e operacionit të zhvilluar gjatë mbrëmjes në Tiranë, ku u zbulua një tavolinë pokeri brenda një lokali. Siç duket edhe nga pamjet e siguruara nga Policia, të arrestuarit janë duke luajtur poker në tavolinë nëlokalin që administrohej nga djali i biznesmenit Ymer (Korab) Lala, ku në sallë u janë futur efektivët.
"Mos lëvizni! Mos lëvizi asnjë! Të gjithë kartat e identitetit në tavolinë,"-dëgjohet që thotë efekivi i Policisë teksa i filmon.
MOMENTI ME VIDEO:
Në flagrancë janë arrestuar 11 persona ndërsa po procedohen në gjendje të lirë 7 të tjerë për moskallëzim krimi./ZËRI
Aksioni 'Poker 2'/ I arrestuar jo vetëm djali i Ymer Lalës, në pranga edhe nipi i Flamur Nokës
TIRANË- Djali i biznesmenit Ymer Lala nuk është i vetmi personazh i njohur i arrestuar mbrëmjen e djeshme në Tiranë. Në pranga, përveç Ylard Lalës, ka përfunduar edhe nipi i deputetit të Partisë Demokratike, Flamur Noka. Në njoftimin e Policisë së Shtetit raportohet se në pranga ka përfunduar edhe 32-vjeçari Rexhep Noka.
Por, Policia, e cila ndau dhe pamjet e operacionit, bëri me dije se ishte punonjësi i Gardës së Republikës, Ylard Lala kishte nën adminstrim një lokal në rrugën Andon Zakon Çajupi, ku edhe organizonte lojrat e fatit./ZËRI
ME VIDEO: Organizonte lojëra fati në lokal, arrestohet djali i biznesmenit Ymer Lala
TIRANË- Arrestohet djali i biznesmenit Ymer Lala! Prangosja e të riut ka ndodhur mbrëmjen e djeshme gjatë një aksioni të Policisë së Shtetit për aksionin kundër lojrave të fatit. 24-vjeçari nga Dibra, i cili rezulton të jetë edhe punonjës në Gardën e Republikës, ka përfunduar në pranga si organizator i lojrave të fatit në lokalin e tij.
I riu Ylard Lala kishte nën administrim një lokal në rrugën "Andon Zakon Çajupi", ku gjatë një kontrolli të bërë nga Policia u zbuluan në flagrancë edhe 7 persona të tjerë të cilët ishin duke luajtur në tavolinën e pokerit. Policia ka dalë me një njoftim zyrtar për aksionin duke nxjerrë edhe pamjet e kontrollit të bëra brenda në lokal.
VIDEOJA E AKSIONIT:
24-vjeçari akuzohet për dy vepra penale: "Organizimi ose ushtrimi i veprimtarive të lojërave të fatit në kundërshtim me ligjin", dhe "Vënia në dispozicion e lokaleve për lojëra të palejuara".
NJOFTIMI I POLICISË:
Tiranë
Finalizohet nga Komisariati i Policisë Nr. 2 operacioni policor i koduar "Poker 2". Arrestohen në flagrancë 11 shtetas që u kapën në flagrancë duke organizuar lojëra në kundërshtim me ligjin, në një lokal në rrugën "Andon Zako Çajupi". Procedohen në gjendje të lirë 7 shtetas të tjerë për moskallëzim krimi. Sekuestrohen 1 tavolinë pokeri dhe çipsa, aparate celulare, dhe shuma të ndryshme parash të përfituara nga kjo veprimtari. Shërbimet e Komisariatit të Policisë Nr. 2 në vijim të punës për goditjen e veprimtarisë së paligjshme të lojërave të fatit, bazuar në informacionet e siguruara nga inteligjenca informative për një rast të ushtrimit të kësaj veprimtarie, kanë organizuar dhe finalizuar operacionin policor të koduar "Poker 2". Në kuadër të këtij operacioni u arrestuan shtetasit: - Y. L., 24 vjeç, banues në Tiranë, për veprat penale "Organizimi ose ushtrimi i veprimtarive të lojërave të fatit në kundërshtim me ligjin", dhe "Vënia në dispozicion e lokaleve për lojëra të palejuara", parashikuar nga nenet 197 dhe 197 të Kodit Penal; - E. F., 43 vjeç, N. P., 49 vjeç, F. R., 58 vjeç, R. N., 32 vjeç, A. T., 25 vjeç, M. N., 46 vjeç, H. B., 23 vjeç, R. K., 26 vjeç, E. V., 38 vjeçe, dhe C. M., 56 vjeç, për veprën penale "Organizimi ose ushtrimi i veprimtarive të lojërave të fatit në kundërshtim me ligjin", parashikuar nga neni 197 i Kodit Penal. Gjithashtu, u proceduan penalisht shtetasit E. N., 18 vjeç, F. P., 39 vjeç, K. N., 36 vjeç, K. P., 21 vjeç, A. Sh., 34 vjeçe, D. Gj., 33 vjeç, dhe H. D., 35 vjeç, për veprën penale "Moskallëzimi i krimit", parashikuar nga neni 300 i Kodit Penal. Gjatë kontrolleve të ushtruara, shërbimet e Policisë kanë kapur në flagrancë duke luajtur lojëra fati në kundërshtim me ligjin, shtetasit e arrestuar, në një lokal në administrim nga shtetasi Y. L., ndërsa 7 shtetasit e proceduar në gjendje të lirë, kanë pasur dijeni për ushtrimin e kësaj veprimtarie, dhe nuk e kanë kallëzuar pranë organeve kompetente. Në cilësinë e provës materiale u sekuestruan 1 tavolinë pokeri dhe çipsa, aparate celulare, dhe shuma të ndryshme parash të dyshuara të përfituara nga kjo veprimtari. Materialet i kaluan Prokurorisë, për veprime të mëtejshme./ZËRI
