Bujar Spahiu sërish në krye të KMSH: Pranoj kritikat! Për urrejtjen ndjek rrugën ligjore
TIRANË- Ka përfunduar procesi për zgjedhjen e kreut të Komunitetit Mysliman Shqiptar. Bujar Spahiu është zgjedhur sërish në krye të Komunitetit Mysliman të Shqipërisë, me 82 vota, nga 92 vota në total. Pjesëmarrës në votim ishin 92 përfaqësues, 2 munguan.
Dy kandidatët e tjerë, ishin administratori i myftinisë së Durrësit, Eduard Shefki dhe Emir Vathaj, myfti i Beratit të cilët morën nga 3 vota, ndërsa 4 të tjera rezultuan të pavlefshme.
Rezultati:
Bujar Spahiu – 82 vota
Eduard Shefki – 3 vota
Emirjon Vathaj – 3 vota
E pavlefshme – 4 vota
Pas zgjedhjeve, Spahiu mbajti një fjalim të shkurtër duke u shprehur se ka qenë dhe do të jetë i hapur ndaj çdo kritike që adresohet ndaj tij. Por po ashtu, paralajmëroi se për të gjithë gjuhën e urrejtjes (cilësohet si gylenist nga një pjesë e besimtarëve), do të ndjekë rrugën ligjore.
“Unë do të ndjek rrugën, traditën, e moralit të lartë të profetit. Do të vijoj të dëgjoj me vëmendje kritikat e sinqerta që vijnë ndaj meje. Ky institucion përfaqëson të gjithë myslimanët në republikën e Shqipërisë. Allahu i ndihmon dhe ata që nëse u japin pushtet në tokë, kryejnë faljen dhe pengojnë atë që është e mbrapsht. Do të ndjek me besnikëri, siç kam bërë deri më sot. Zoti urdhëron që të jemi të drejtë dhe të sillemi mirë me të gjithë, pavarësisht racës dhe ngjyrësh. Allahu është vlerësuesi më i drejtë. Unë kam qenë i hapur ndaj çdo kritike dhe ju garantoj që do të jem në mes jush deri në atë masë sa gjithçka të zgjidhet. Institucioni që unë drejtoj do të ndjek të gjitha rrugët ligjore ndaj kujdo që nxit urrejtje mes motrave dhe vëllezërve myslimanë“, u shpreh Spahiu pas zgjedhjes në krye të Komunitetit Mysliman.
Sot njëkohësisht me zgjedhjet u zhvillua një tubim, ku një pjese e besimtarëve myslimanë akuzuan Komunitetin Mysliman, që është i kapur nga Shoqata Gyleniste./ZËRI
VD- Protestë para KMSH: Të largohen gylenistët!
TIRANË-Zgjedhjet për kreun e Komunitetit Mysliman të Shqipërisë janë shoqëruar me protestë. Një grup besimtarësh myslimanë që janë kundër drejtuesve aktual të komunitetit Mysliman Shqiptar, po protestojnë paralelisht me zgjedhjet. Protestuesit, i kanë cilësuar mbështetësit dhe zyrtarët aktualë të KMSH-së si "gylenistë". Madje para tyre kanë dalë edhe me pankarta në duar: 'Gylenistë nuk ju duam', 'Komuniteti i marrë peng nga Bujar Spahiu dhe Lauren Luli', akuzojnë drejtuesit aktual si gylenist dhe pjesëtarë të grupit famëkeq 'FETO' në Turqi.
Protesta është duke u zhvilluar në ditën e zgjedhjeve për kreun e ri të Komunitetit Mysliman të Shqipërisë.
Zgjedhjet do të zhvillohen në ambientet e Medresesë së Tiranës, ndërsa në garë janë tre kandidatë, Bujar Spahiu, Eduard Shefki dhe Emirjon Vathaj. Bujar Spahiu është kreu aktual i KMSH, mandati i të cilit përfundon pasi e mori detyrën në vitin 2019. Eduart Shefki është administrator i Myftinisë së Durrësit ndërsa Emirjon Vathaj është Myfti i Beratit. Ky tubim është njoftuar edhe më herët, duke njoftuar edhe policinë e shtetit të marrë masa./ZËRI
Mes tensionesh dhe përplasjesh, mbahen sot zgjedhjet për kreun e KMSH-së
TIRANË- Këtë të shtunë do të mbahen zgjedhjet për kreun e ri të Komunitetit Mysliman të Shqipërisë. Zgjedhjet do të zhvillohen në ambientet e Medresesë së Tiranës, ndërsa në garë janë tre kandidatë, Bujar Spahiu, Eduard Shefki dhe Emirjon Vathaj.
Bujar Spahiu është kreu aktual i KMSH, mandati i të cilit përfundon pasi e mori detyrën në vitin 2019. Eduart Shefki është administrator i Myftinisë së Durrësit ndërsa Emirjon Vathaj është Myfti i Beratit. Këto zgjedhje zhvillohen në një valë të nxehtë tensionesh dhe përplasjesh në KMSH.
Kjo pasi disa anëtarë të KMSH, myfti dhe studiues i kanë cilësuar zgjedhjet për kreun e KMSH si një farsë, të organizuar nga gylenistët, të cilët duan të zaptojnë instutucionin. Më herët, ka pasur incidente dhe në xhami, si tek “Dine Hoxha”, ku besimtarët shpërthyen në fyerje ndaj Myftiut të Tiranës Lauren Luli, të cilin e akuzonin si anëtar të organizatës “FETO”. Kjo e fundit është shpallur organizatë terroriste nga Ankaraja dhe Presidenti turk Rexhep Tajip Erdogan./ZËRI
