PERU - Mbikëqyrja Kombëtare e Administratës Doganore dhe Tatimore (Sunat) e Perusë ndërhyri në një dërgesë me pllaka druri nga Bolivia, që ishte në fakt një ngarkesë me më shumë se 7.2 ton kokainë. Operacioni u zhvillua në portin e Callaos.
Zbulimi është kryer nga një prej qenve të njësisë K-9 të subjektit peruan, i cili ka reaguar pozitivisht gjatë kontrollit të një kontejneri. Hapja e paketave të ruajtura brenda kontejnerit metalik të ngarkesës bëri të mundur kryerjen e testeve përkatëse në terren, të cilat konfirmuan se pllakat përmbanin sasi kokaine. “Dërgesa, që vinte nga Bolivia, ishte në tranzit për në Belgjikë. Tërhoqi vëmendjen, se bëhej fjalë për pllaka druri, artikuj jo shumë të zakonshëm për t'u eksportuar dhe se kompania përgjegjëse për menaxhimin ndodhej në La Paz. Nisur nga këto indikacione, është klasifikuar si rrezik i lartë dhe është kryer ekzaminimi fizik përkatës. Madje u konstatua se ngarkesa e sekuestruar në Bolivi do të zhvendosej edhe në Peru, për t'u dërguar në Belgjikë. Nisur nga këto indikacione, doganierët peruan vazhduan të caktojnë inspektimin e dërgesës së pllakave. Gjatë shpimit të tyre, u zbulua se brenda tyre kishte blloqe të zeza, të përbëra tërësisht nga kokaina”, thanë zyrtarët policorë.
Ndërhyrja u krye me mbështetjen e Policisë Kombëtare të Perusë dhe Ministrisë Publike, e cila urdhëroi verifikimin e të gjithë grupit të pllakave, numërimin dhe sekuestrimin e drogës që përmbanin. Nga operacioni janë sekuestruar më shumë se 7 ton kokainë, vlera e së cilës në tregun e zi europian i kalon 245 milionë dollarët.
Prokurori përgjegjës i çështjes ka urdhëruar nisjen e hetimeve për identifikimin e autorëve të këtij krimi. Sipas rezultateve të para, prapa sasisë të madhe të kokainës mund të qëndrojë një mafia ndërkombëtare, që vepron në Bolivi dhe më pas tregton lëndën narkotike drejt Europës. “Ky është zbulimi i parë i madh i vitit, Sunat rithekson angazhimin e tij për të luftuar kundër kontrabandës dhe trafikut të paligjshëm të mallrave dhe ju rikujtojmë se komercializimi i drogës kërcënon shëndetin publik dhe formalizimin, prandaj do vazhdojnë kontrollet”, thuhet në njoftimin e portit, ku u kap lënda narkotike.
Së fundi, vlen të theksohet se raste të ngjashme janë zbuluar edhe në portin kilian të Aricas, të cilat kulmuan me sekuestrimin e ngarkesave boliviane të drunjve, që ishin mbushur me kokainë./Portal Portuario - ZËRI/
