ITALI- Zëvendësministri i Kulturës, Vittorio Sgarbi ka njoftuar se jep dorëheqjen nga posti i tij në ministri. Sgarbi kishte qenë në shënjestër të lajmeve italiane, pasi ka prezantuar seminarë dhe kurse, edhe pas marrjes së detyrës si zëvendësministër i Kulturës. Njëkohësisht, kritiku i njohur i artit është përgjegjës edhe për një rast falsifikimi të pikturës së shekullit XVII “Arrestimi i Shën Pjetrit”, që iu gjet në zotërim.
“Jam dorëhequr menjëherë si zëvendësministër, në orët në vijim do ta njoftoj zyrtarisht kryeministren Giorgia Meloni”, tha Vittorio Sgarbi nga Milano.
Edhe pse i njohur për skandalet e tij, Sgarbi shtatorin e kaluar e 'kaloi masën'. 71-vjeçari Sgarbi, në një event të organizuar në muzeun kombëtar të artit modern, iu referua performancës së tij seksuale, duke e përshkruar organin mashkullor si një "organ dije." Për Berlusconin tha se kishte fjetur me më pas se 100 femra gjatë gjithë jetës së tij, gjë që për të ishte e trishtë, ndërsa për vetën tha: Unë nuk kam një instrument matës kështu që nuk e di, por mund të vlerësoj mesatarisht tre gra në muaj, por kur isha më aktiv kisha 9 në muaj. Po ta llogaris, janë të paktën 1500 gra.
Pas publikimit të videos nga La Repubblica, 44 punëtore në muzeun e artit modern të Italisë i kërkuan presidentit të tij t'i mbronte. Në të njëjtën kohë, “Lëvizja 5 yje” kërkoi dorëheqjen e Sgarbit, duke i cilësuar komentet si “seksiste”. Ndër vite kritiku italian ka shkaktuar probleme dhe polemika. Në vitin 2020 teksa po udhëtonte në Shqipëri ndaloi edhe në Bylis, qytet antik të cilin e konsideroi grek. Deklarata e tij bëri bujë edhe në Shqipëri duke u komentuar edhe nga historianët. Po atë verë teksa po pushonte në Shqipëri, rrezikoi mbytjen./ZËRI
