KOSOVË- Kryeministri i Kosovës, Albin Kurti ka reaguar sërish për sulmin terrorist të 24 shtatorit në Banjskë të Zveçanit.
Ai ka thënë se Policia e ka konfirmuar që ky sulm ishte pjesë e një plani më të madh për të aneksuar veriun e Kosovës, përmes një sulmi të koordinuar nga 37 pozicione të ndryshme.
Kurti ka shkruar se kjo do të pasonte me krijimin e një korridori për në Serbi, i cili do ta mundësonte furnizimin me armë dhe trupa.
“Bazuar në dokumentacionin e konfiskuar, Policia e Kosovës ka konfirmuar se sulmi terrorist ishte pjesë e një plani më të madh për të aneksuar veriun e Kosovës përmes një sulmi të koordinuar nga 37 pozicione të ndryshme. Do të pasonte krijimi i një korridori për në Serbi, për të mundësuar furnizimin me armë dhe trupa”, ka shkruar Kurti në profilin e tij në Twitter.
Gjatë ditës së djeshme, Kurti publikoi pamje të terroristëve serbë që trajnoheshin katër ditë para se të kryhej sulmi i 24 shtatorit, ku mbeti i vrarë efektivi Afrim Bunjaku.
-
Kurti nxjerr pamjet: Terroristët u stërvitën në bazën serbe
1 Tetor, 21:32
Në një postim në ‘X’, Kurti shkruante se stërvitjet janë bërë në një nga bazat kryesore të ushtrisë serbe, në Pasuljanske Livade. Ai shton se sulmet gëzonin mbështetjen dhe planifikimin e plotë të shtetit serb./Zëri.ai
