GREQI-Ministria e Krizave Klimatike dhe Mbrojtjes Civile e Greqisë ka shpallur gjendjen e jashtëzakonshme në bashkinë e Thirës për shkak të tërmeteve të vazhdueshme që janë regjistruar mes Santorinit dhe Amorgos. Sipas vendimit, shpallja e gjendjes së jashtëzakonshme është bërë për të trajtuar nevojat emergjente dhe për të menaxhuar pasojat e aktivitetit sizmik që ka prekur zonën. Gjendja e jashtëzakonshme do të mbetet në fuqi për një periudhë prej një muaji.
“Vendosim shpalljen e Gjendjes së Jashtëzakonshme për Mbrojtjen Civile në Bashkinë Thira, për të adresuar nevojat emergjente dhe për të menaxhuar pasojat që vijnë nga aktiviteti sizmik që ka ndodhur së fundmi në zonën e mësipërme. Kjo deklaratë do të jetë në fuqi nga data 1 shkurt dhe do të zgjasë për një muaj, deri më 1 mars”,-thuhet në njoftim.
Më shumë se 7.700 tërmete janë regjistruar në zonën Santorini – Amorgos nga 26 janari deri më 4 shkurt, sipas një njoftimi urgjent të lëshuar nga Universiteti Kombëtar dhe Kapodistrian i Athinës (EKPA). 51 zjarrfikës dhe 9 automjete ndodhen në Santorini duke përfshirë: Qendrën Operative Mobile "OLYMPOS", një ekip nga EMAK 1 me një qen shpëtimi, një ekip nga 1st EMODE dhe ekipin S.mi.EA. me 2 dronë të PE.PY.D. Atika. Në gatishmëri është edhe një helikopter i Zjarrfikësve me shpëtimtarë nga ajri. Ndërkohë kryeministri Kyriakos Mitsotakis do të udhëtojë për në Santorini i shoqëruar nga ministri i Mbrojtjes Civile, Vasilis Kikilias.
Sizmiologët janë shprehur se ishulli në detin Egje mund të goditet nga një tërmet me magnitudë 6 rihter, ku i kërkohet banorëve të bëjnë kujdes. Shumë banorë janë larguar nga ishulli gjatë ditës së djeshme, ndërsa të tjerë janë evakuuar dhe strehuar në disa zona, të cilat janë ngritur nga autoritetet. Lëkundjet e tërmet janë përhapur edhe në Turqi, me autoritetet vendase që iu kërkuan banorëve në Bodrum, Mugla dhe Aydin të jenë në gatishmëri, pasi po rritet rrezik për një cunami. Deri më tani në Santorini janë raportuar vetëm dëme materiale, fatmirësisht askush nuk është lënduar./ZËRI
