FIER- Me kërkesë të Prokurorisë, Gjykata e Fierit ka lënë në masën e sigurisë “Arrest me burg”, 39-vjeçarin Xhuliano Miho, i cili më 5 korrik qëlloi disa herë me thikë 23-vjeçarin, Xhimi Baka duke e lënë të vdekur. Prokuroria bën me dije se ndaj Mihos ka ngritur dy akuza, ajo e vrasjes me dashje dhe e mbajtjes pa leje e armëve të ftohta.
Shkak për ngjarjen e rëndë dyshohet të jetë bërë xhelozia që Miho kishte për ish-bashkëshorten e tij, e cila tashmë kishte nisur një romancë të re me Xhimi Bakën, me të cilin pret dhe një fëmijë. Lidhjen prisnin ta zyrtarizonin pas divorcit zyrtar. Në dëshminë e tij, autori ka deklaruar se e ka vrarë të riun pasi gruaja i kishte thënë se po kënaqej me të. Ndërsa vëllai i viktimës, shprehet se Xhimi dhe gruaja duheshin shumë me njëri-tjetrin.
Edhe më e rëndë është një dëshmi e dhënë nga partnerja e Xhimi Bakës. Kjo e fundit ka deklaruar në emisionin “Me zemër të hapur”, se bashkë me Xhimin kishin bërë disa herë denoncime në Policinë e Fierit pasi i kërcënonte Xhuliano Miho, por që sipas saj autoritetet nuk bënë asgjë. Ajo shprehet se kur ka bërë denoncimin efektivët janë talluar me të dhe nuk kanë kryer asnjë veprim. Ndërsa mohon që ti ketë shkruar mesazhet që Miho pretendon në dëshminë e tij para hetuesve.
NJOFTIMI I PROKURORISË:
Prokuroria e Fierit regjistron p.penal për ‘Vrasje me dashje’, ‘Prodhimi, mbajtja pa leje e armëve të ftohta’ për shtetasin Xh.M, i cili vrau të riun në Lagjen ‘11 Janari. ’Prokuroria pranë Gjykatës së Shkallës së Parë të Juridiksionit të Përgjithshëm, Fier, ka regjistruar procedimin penal për ‘Vrasje me dashje’ dhe ‘Prodhimi, mbajtja, blerja apo shitja pa leje e armëve të ftohta’ parashikuar nga nenet 76 dhe 279 të Kodit Penal ndaj shtetasit Xh.M., i cili pak ditë më parë goditi me mjet të mprehtë shtetasin Xh.B. I riu humbi jetën për shkak të plagëve të mara.
Në bashkëpunim me policinë gjyqësore, u bë e mundur dokumentimi ligjor i ngjarjes së ndodhur më datë 05.07.2024, në lagjen “11 Janari”, Fier. Pas arrestimit në flagrancë të autorit të dyshuar, shtetasit Xh.M., Prokuroria Fier kërkoi në gjykatë vleftësimin e ligjshëm të arrestit në flagrancë dhe caktimin e masës së sigurimit me karakter shtrëngues “Arrest në burg”, parashikuar nga neni 238 i Kodit Procedurës Penale. Kjo kërkesë u miratua nga Gjykata e Shkallës së Parë Juridiksionit të Përgjithshëm Fier. Në lidhje me këtë procedim penal, prokuroria informon se po kryhen hetime të plota dhe në dinamikë me qëllim përcaktimin e rrethanave të plota, motiveve dhe dinamikës së ngjarjes./ZËRI
