TIRANË- Gjykata e Posaçme kundër Korrupsionit dhe Krimit të Organizuar ka lënë në burg Elvis Ndrecën, kushëririn e deputetit të Partisë Socialiste Eduard Ndrecën. 28-vjeçari u arrestua dy ditë më parë në Lezhë, pasi ishte shpallur në kërkim në kuadër të operacionit të koduar "Revanshi". Ndreca doli në përgjimet e SKY ECC, në dosjen "Revanshi" të SPAK dhe akuzohet për veprën penale të “sigurimit të kushteve për të kryer vrasje” ndaj Durim Bamit.
Më 31 Janar, Prokuroria e Posaçme kundër Korrupsionit dhe Krimit të Organizuar njoftoi se ka përfunduar hetimet dhe ka nisur komunikimin e akuzave për anëtarët e 7 grupeve kriminale, që u goditën në kuadër të operacionit “Revanshi”. Në kuadër të këtij operacioni të ndërmarrë në maj 2024 u krye fillimisht arrestimi i 20 personave, 14 prej të cilëve në Shqipëri, dhe 6 jashtë vendit, përkatësisht 2 në Itali, 1 në Gjermani, 1 në Spanjë e 2 në Belgjikë./ZËRI
