SARANDË- Gjykata e Sarandës ka vendosur sekuestrimin e rreth 6600 m2 tokë në bregdetin e këtij qyteti, të cilat hetimeve të kryera nga Prokuoria ato i kanë kaluar shtetit. Sipas hetimeve, kjo sipërfaqe është përfituar nga të pandehurit në mezin e tyre edhe zyrtarë, përmes falsifikimit të dokumenteve. Për këtë çështje, prokurori Kledian Llaho kërkoi arrestimin e 10 personave të cilët ishin përfshirë në këtë skemë.
Ndërsa Gjykata e Sarandës dënoi me burg 5 të pandehurit Fredi Merkuri, Valter Llomi, Argonida Canaj (përfitues te tokave përmes dokumenteve të falsifikuar), noterin Aleko Anagnosti dhe Behar Mucobega. Magjistrati Alban Veçani dënoi me 1 deri në 1.2 vite burg për falsifikim dokumentash të pandehurit Merkuri, Valter Llomi, Arhondia Caraj pas aplikimit të gjykimit të shkurtuar. Ndërsa Behar Mucobega dhe Aleko Anagnosti u dënuan me dy vite burg.
Gjithashtu u vendos sekuestrimi dhe kalimi në favor të shtetit të sipërfaqes prej 6640 m2.
Më 1 qershor 2022, prokurori Llaho kërkoi arrestimin e 10 pesonave të dyshuar për veprat penale “falsifikim dokumentash”, “pastrim i produkteve të veprës penale” dhe “shpërdorim detyre”. Pas hetimeve të Prokurorisë së Sarandës qytetarë dhe zyrtarë u akuzuan për tjetërsimin përmes dokumenteve false të mbi 10 mijë m2 truall buzë detit, të cilat më pas u pajisën me certifikata pronësie.
Prokuroria lëshoi urdhër arreste, si edhe u sekuestruan pronat e tjetërsuara. Pas hetimeve intensive, dosja shkoi në Gjykatë, ndërsa ende vijojnë hetimet për të dyshuarit e tjerë dhe për rreth 4 mijë m2 sipërfaqe. Gjatë këtyre tre viteve është kërkuar sekuestrimi i rreth 15 mijë m2 truall buzë detit në Sarandë e Ksamil, të dyshuara si të përfituara me dokumente të falsifikuara./ZËRI
