ELBASAN- Një shpërthim i dyshuar me lëndë plasëse është regjistruar në orët e para të mëngjesit të sotëm në lagjën "Çlirimi" në Elbasan. Sipas njoftimit të policisë, mësohet se si pasojë e shpërthimit janë shkaktuar dëme materiale, duke dëmtuar derën e jashtme e rrethimit të banesës së shtetasit Shefki Frakulli, 69-vjeç.
Sipas të dhënave paraprake, lënda plasëse dyshohet se është vendosur pranë hyrjes së banesës, ndërsa nuk raportohet për persona të lënduar. Sipas burimeve, në banesë jeton çifti Frakulli, ndërsa dy djemtë e familjes ndodhen prej vitesh në emigracion, përkatësisht në Angli dhe Itali.
“Elbasan/Informacion paraprak. Në lagjen “Çlirimi”, është dëmtuar, dyshohet me lëndë plasëse, dera e jashtme e rrethimit të banesës së shtetasit Sh. F., 69 vjeç. Si pasojë janë shkaktuar vetëm dëme materiale. Grupi hetimor vijon veprimet për zbardhjen e rrethanave, identifikimin dhe kapjen e autorit/autorëve”, njofton Policia.
Hetimet vijojnë për të zbardhur motivin e ngjarjes dhe identifikuar autorët, ndërsa një nga pistat që po verifikohet është mundësia që shpërthimi të ketë qenë një akt intimidues ndaj familjes. Mëgjithatë, deri më tani nuk ka të dhëna zyrtare që e konfirmojnë këtë apo që e lidhin ngjarjen me aktivitetin e djemve të familjes në emigracion./ZËRI
