TIRANË- Prokuroria e Tiranës ka mbyllur hetimet dhe ka dërguar për gjykim, 3 ish-zyrtarët e Komunës së Bërxullës që kanë lejuar tjetërsimin e 7500m2 tokë, përmes dokumenteve të falsifikuara. Në krye të skemës qëndron ish-kreu i Komunës Ymer Marku, i cili është nën hetim dhe për skema të tjera të ngjashme, për abuzimin me pronat.
Policia ka mbyllur hetimet për Ymer Markun, Kujtim Balliun, dhe Agim Llocin, të tre me detyra në pushtetin lokal, si dhe për shtetasin Kujtim Allmeta. Ata akuzohen se në bashkëpunim me njëri-tjetrin kanë shpërdoruar detyrën duke falsifikuar dokumentet e një sipërfaqeje toke, në fshatin Bërxullë për t'ja shitur më pas kompanisë "Alko Impex Construction", në pronësi të Arbër Abazit (nipi i Sadri Abazit). Duke qenë se dyshohet se është blerë me dokumente të falsifikuara, toka është sekuestruar me urdhër të Prokurorisë së Tiranës.
NJOFTIMI I PROKURORISË:
Lejuan përvetësimin e 7500m2 tokë me dokumente të falsifikuara, Prokuroria e Tiranës çon në gjyq tre ish-zyrtarët e Komunës Bërxullë për ‘Shpërdorim detyre’ dhe shtetasin K.A. për ‘Falsifikim të dokumenteve’
Prokuroria pranë Gjykatës së Shkallës së Parë të Juridiksionit të Përgjithshëm Tiranë përfundoi hetimet për procedimin penal nr.5783 të datës 16.09.2020 dhe dërgoi në gjyq katër persona, mes tyre tre ish-zyrtarë të komunës Bërxullë, për veprat penale ‘Shpërdorim Detyre’, ‘Falsifikim të dokumenteve’ dhe ‘Pastrimi i produkteve të veprës penale’ parashikuar në nenet 248, 186/2 dhe 287 të Kodit Penal.
Sipas prokurorisë, shtetasit Y.M., K.B., A.L. në bashkëpunim me njëri-tjetrin lejuan përfitimin e paligjshëm nëpërmjet falsifikimit të 7500 m2 tokë në Bërxullë nga shtetasi K.A., i cili më pas e shiti në vlerën 10.000.000 lekë.
Bazuar në veprimet hetimore, deklarimet e marra, provat e mbledhura dhe ekspertimi i kryer, prokuroria arriti në konkluzionin se shtetasi K.A. ka kryer krimin e falsifikimit me pasoja të rënda për personat e tretë. Nërpërmjet dokumenteve të falsifikuara, ai është pajisur me çertifikatë pronësie për pasurinë në Bërxullë 7500m2 dhe më pas në vitin 2020 e shiti duke përfituar shumën prej 10.000.000 lekësh.
Po kështu, nga hetimet rezultoi se të pandehurit, shtetasit Y.M., K.B. dhe A.L. konsumuan veprën penale të ‘Shpërdorimit të detyrës’ pasi kryen veprime në kundërshtim me ligjin. Këta punonjës me veprimet dhe mosveprimet e tyre kanë cenuar interesat e personave të tretë për shkak të dëmit të konsiderueshëm ekonomik që u ka ardhur si pasojë e tjetërsimit të paligjshëm të pasurisë së tyre.
Shtetasi K.B. i cili nga muaji korrik 2011 deri në shtator 2015 ka mbajtur postin e Përgjegjësit të Zyrës së Mbrojtjes dhe Menazhimit të Tokës, në Komunën Bërxullë, duke ndërvepruar me ish-zyrtarët e tjerë, mes tyre dhe ish-kryetarin e Komunës dhe punonjësin tjetër, përpiloi shkresat për regjistrimin e pasurisë në emër të shtetasit K.A. pa kryer verifikimin e dokumentacionit.
Me kërkesë të prokurorisë, 7500m2 tokë e përfituar me dokumente të falsifikuara është sekuestruar./ZËRI
