ROMË – Qeveria italiane ka miratuar marrëveshjen ndërmjet Shqipërisë dhe Republikës së Italisë për forcimin e bashkëpunimit në çështjet e migracionit, nënshkruar në Romë më 6 nëntor 2023. Dakordësimi erdhi pasditen e sotme nga Këshilli i Ministrave të Italisë. Pakti u nënshkrua pikërisht një muaj më parë në Palazzo Chigi nga Giorgia Meloni dhe kryeministri shqiptar Edi Rama. Pas tranzicionit institucional sot, siç tha Antonio Tajani, çdo gjë i kaloi parlamentit italian.
"Do të ketë një debat, ka një shumicë solide që dëshiron miratimin e marrëveshjes dhe jam i bindur që në fund marrëveshja do të miratohet. Ne duam të respektojmë institucionin e parlamentit dhe do të ketë një debat për këtë. Pasi të dëgjohen komentet nga të gjitha palët, jam i bindur që marrëveshja në fund do të miratohet”, kishte deklaruar ministri i Jashtëm italian para miratimit të marrëveshjes. Shpenzimet financiare dhe rregullat janë parashikuar qartë në marrëveshje. Marrëveshja do të jetë në fuqi për pesë vjet nga data e rënë dakord dhe mund të ketë edhe shtyrje të afatit të saj.
Çfarë parashikon marrëveshja
Teksti përfundimtar ndihmon për të kuptuar më mirë se si do të marrë formë projekti për ndërtimin në Shqipëri të strukturave të planifikuara për refugjatët në portin e Shëngjinit, pranë Barit, dhe në zonën e Gjadrit, 20 kilometra brenda territorit shqiptar. E para, vendi ku do të zbarkojnë emigrantët e ngarkuar në Mesdhe në bordin e anijeve italiane, do të ketë një perimetër afërsisht 240 metra dhe një gardh të jashtëm 4 metra, d.m.th. tela me gjemba ose sisteme të ngjashme. Brenda do të ketë rrugë të ndryshme: ajo për emigrantët, ajo për trajtimin kundër zgjebes, rrugët e daljes drejt një kampi pritjeje dhe drejt kampit të paraburgimit.
Struktura në Gjadër do të jetë në dispozicion për konstatimin e kushteve për mbrojtjen ndërkombëtare dhe për riatdhesimin e emigrantëve, që nuk kanë të drejtë të hyjnë dhe të qëndrojnë në Itali; do të ndërtohet në një sipërfaqe ndërtimi prej 77700 metrash katrorë. Harta kadastrale tregon 10 objekte që mbulojnë pothuajse 2 mijë metra katrorë. Në këtë zonë do të ndërtohen edhe godinat e Policisë së Shtetit. Një çështje mbetet ajo e numrit të emigrantëve. Protokolli sqaron se strukturat mund të presin maksimumi 3 mijë emigrantë në të njëjtën kohë. Kryeministrja Meloni, në nënshkrim, kishte folur për 36 mijë refugjatë në vit, duke llogaritur procedurat e përfunduara në katër javë.
Zonat nën juridiksionin italian
Nënsekretari Giovanbattista Fazzolari sqaroi se emigrantët mund të ndalohen përtej 28 ditësh qëndrimi edhe në Shqipëri. Maksimumi i lejuar nga ligji italian është 18 muaj. Në të gjitha aspektet, në fund të fundit, zonat e dhëna nga Tirana për Romën do t'i nënshtrohen ekskluzivisht juridiksionit italian. Dhe Italia do ta mbajë barrën 100%; do të duhet të krijojë një fond garancie dhe, si paradhënie rimbursimi për vitin e parë, brenda tre muajve nga hyrja në fuqi e marrëveshjes, do të duhet të paguajë 16.5 milionë euro, në llogarinë e posaçme të thesarit të shtetit, të hapur nga Shqipëria.
Siç përcaktohet në marrëveshje dhe në anekse, shpenzimet, ndër të tjera, përfshijnë ato të ndihmës spitalore, blerjen e pajisjeve mjekësore, barnave dhe vaksinave, shpenzimet për përdorimin e policisë (forcat policore shqiptare janë përgjegjëse për mbikëqyrjen e jashtme), blerjen e karburantit për automjetet dhe pajisjet, si dhe çdo kosto ligjore për mbrojtjen para gjykatave ndërkombëtare dhe për kompensimin e dëmeve të vendosura nga gjykatat kombëtare ose ndërkombëtare./Zëri.ai/
