FIER- Fabjan Bujaraj, 31 vjeç është vënë në prangat e Policisë këtë të martë pasi akuzohet për vjedhje. Sipas bluve të Fierit i riu nën kërcënimin e armës (armë gjahu) ka grabitur një pikë karburanti në orët e para të mëngjesit të kësaj të marte. Bujaraj ka hyrë i maskuar në pikën e karburantit dhe pasi ka kërcënuar me armën e gjahut punonjësin ka marrë prej atje shumën e parave (ende nuk dihet vlera).
Policia bën me dije se në cilësinë e provës materiale janë sekurestruar arma e gjahut, makina e përdorur në krim dhe veshjet e përdorura në ngjarje. Ndërkohë gjatë kontrollit në banesë efektivët kanë gjetur një sasi lënde narkotike heroinë dhe një peshore elektroinike.
NJOFTIMI I POLICISË:
Lushnjë. Finalizohet operacioni policor i koduar “How it ends”, për zbardhjen e një vjedhjeje të kryer në kërcënimin e armës. Policia identifikon, kap dhe vë në pranga 31-vjeçarin që hyri i maskuar në një karburant dhe mori një shumë parash, në kërcënimin e armës. Sekuestrohen arma e gjahut e përdorur nga autori, automjeti me të cilin ai u largua pas ngjarjes, dhe veshjet që kishte gjatë vjedhjes.
Sekuestrohen edhe një sasi lënde e dyshuar narkotike heroinë dhe një peshore elektronike, që u gjetën në banesën e 31-vjeçarit, me precedent të mëparshëm në fushën e narkotikëve. Shërbimet e Komisariatit të Policisë Lushnjë, menjëherë pas marrjes së njoftimit për një rast vjedhjeje me armë, në një karburant, kanë organizuar punën në kuadër të operacionit policor të koduar “How it ends”, me qëllim zbardhjen e vjedhjes, identifikimin dhe kapjen e autorit.
Si rezultat i veprimeve të shpejta proceduralo-hetimore, me mbështetjen e inteligjencës policore, është zbardhur ky rast vjedhjeje dhe është identifikuar autori i dyshuar, shtetasi F. B., 31 vjeç, banues në Lushnjë. Në kuadër të operacionit pas disa orësh ndjekjeje nga shërbimet e Komisariatit të Policisë Lushnjë në bashkëpunim me shërbimet e Policisë së Elbasanit, u bë e mundur kapja në Elbasan e 31-vjeçarit.
Nga hetimet ka rezultuar se shtetasi F. B., në orët e para të mëngjesit të sotëm, ka hyrë i maskuar në një karburant dhe duke kanosur me armë gjahu, ka marrë një shumë parash (një pjesë të xhiros ditore). Në cilësinë e provës materiale janë sekuestruar arma e gjahut që ka përdorur autori për të kryer vjedhjen, automjeti që kishte marrë me qira, veshjet që ka mbajtur gjatë vjedhjes, një sasi lënde e dyshuar narkotike heroinë dhe një peshore elektronike.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme, për veprat penale "Vjedhja me armë", "Prodhimi dhe mbajtja pa leje e armëve të gjuetisë dhe sportive" dhe "Prodhimi dhe shitja e narkotikëve"./Zëri.ai
