ITALI- Mark Samson kishte dy telefona në dorë. Njërin e kishte telefonin e tij dhe tjetrin ia kishte marrë Ilaria Sulës pasi e kishte vrarë. Siç duket edhe nga tabulatet dhe qelizat e telefonit, mesazhi i fundit i shkruar nga Ilaria daton rreth orës 20.00 të datës 25 mars. E njëjta datë në të cilën u ngrit alarmi për zhdukjen e saj. Por ishte Mark, ai që u kthente përgjigje edhe miqve të Sulës, duke u hequr si ajo.
Mesazhet me shoqen:
Shoqja: Kam marrë lajmin se Ilaria është zhdukur. Që nga e marta, por a dini gjë?
"Ilaria": Po mundohemi ta zgjidhim me Policinë, sapo të kem lajme do t’ju përditësoj, nëse ju intereson. Faleminderit.
Shoqja: Mendova se mbase ti di diçka...Më vjen keq që të shkruaj në një moment kaq të vështirë, faleminderit Mark.
Ndërsa për mediat italiane, shoqja shtoi: Mu duk një përgjigje e çuditshme. Nëse vajza me të cilën u ndave pak më shumë se një muaj më parë zhduket, atëherë unë do bëja gjithçka për ta gjetur.
Mbrëmjen e së hënës që ndodhi diçka e papritur. 6 ditë pas zhdukjes së saj, Ilaria Sula nxorri një "Story" në Instagram. Ajo nuk shfaqej në postim, por kishte shkruar vetëm: Jam mirë. Faleminderit të gjithëve!
Në atë moment shumë njerëz vendosën ta kontaktojnë, qoftë edhe në Instagram.
"Ajo nuk do të ishte mjaftuar kurrë me një fjali të tillë. Do t'i përgjigjej të gjithëve privatisht. Do të shpjegonte pse, do të justifikohej,"- thanë ata që e njihnin mirë. Por asgjë nga këto nuk ndodhi. Sepse në anën tjetër të ekranit nuk ishte ajo, ishte vrasësi i saj.
Prej një jave e zhdukur, 22-vjeçarja Ilaria Sula u gjet e vrarë. Trupi i pajetë u gjet në një valixhe të hedhur në humnerë në një zonë të pyllëzuar në Poli. Shqiptarja u vra nga ish-i dashuri i saj filipinas, Mark Samson, i cili ndodhet në qeli. Hetuesit arritën të zbulonin se në ditët pas zhdukjes së vajzës, 23-vjeçari filipinas kishte vazhduar të përdorte telefonin e saj dhe bënte postime nga profilet e Ilarias në mediat sociale për të fshirë dyshimet./ZËRI
