LEZHË-Gjykata e Lezhës ka dhënë dënimet në lidhje me përplasjen me armë të ndodhur në muajin prill të viti 2022 në fshatin Kallmet, ku u përfshi dhe ish-kreu i Njesisë Administrative Besnik Simoni. Në lidhje me ngjarjen e ndodhur Gjykata dënoi me 6 vite e 6 muaj burg Besnik Simonin dhe me 20 vite burg Altin Markun.
Simoni u gjet fajtor për veprat penale “Vrasja ne kapërcim të kufijve të mbrojtjes se nevojshme” dhe “Mbajtja pa leje dhe prodhimi i armëve, armëve shpërthyese dhe municionit” dhe u dënua me 6 vite e 6 muaj burgim. Ndërsa Altin Marku u dënua me 20 vite burg për veprat penale” “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”.
Prokurori i çështjes Françesk Ganaj kishte kërkuar dënimin maksimal me 40 vite burg në total për dy të pandehurit, por trupa gjykuese e përbërë nga gjyqtaret Aurel Arapi, Aldi Kareco dhe Migena Laska ju dha një masë dënimi më të butë me 26 vite e 6 muaj burg në total.
Ngjarja ndodhi në prill të vitit 2022 ku mes administratorit dhe Altin Marku, pati shkëmbim zjarri. Sipas dosjes hetimore, ka qenë Altin Marku i cili ka qëlluar me armë zjarri plot 9 herë, në drejtim të ish-funksionarit të pushtetit vendor Besnik Simoni, ndërsa ky i fundit i është përgjigjur me armë zjarri duke qëlluar 19 herë me armë zjarri. Nga të shtënat të dy personat mbetën të plagosur./ZËRI
