TIRANË- Ish-Prokurori i Përgjithshëm, Adriatik Llalla, i dënuar me dy vite burg për fshehje pasurie dhe mosdeklarim të saj, ka kërkuar pushimin e dënimit për shkak të parashtrimit.
Ish-kreu i Prokurorisë së Përgjithshme, Adriatik Llalla u dënua me dy vjet burg dhe 5 vite përjashtim nga shërbimet publike, për fshehjen e pasurisë në tre episode, në shtator të vitit 2021, por vendimi nuk u ekzekutua asnjëherë pasi ai u largua nga vendi dhe zgjodhi të mos përballej me drejtësinë.
Llalla u arratis në Itali, ku kërkoi azil politik, por u arrestua në dhjetor të vitit 2021 në Romë. Më pas, për shkak të gjendjes së tij shëndetësore, Lalla u lirua me kushtin që do të mbahej në survejim nga autoritetet italiane. Më herët, mbrojtja e tij kishte kërkuar edhe në Gjykatën e Lartë pezullimin e dënimit me burg, duke argumentuar se Llalla vuante nga një sëmundje e pashërueshme. Kërkesa nuk u pranua./ZËRI
