TIRANË- Kladjon Kocja, 26 vjeç, është arrestuar nga Policia e Tiranës, pasi dyshohet se i ka vjedhur me dhunë varësen nga qafa një gruaje në rrugën “Konferenca e Pezës”. Sipas Policisë, Kocja dyshohet edhe për një tjetër vjedhje me dhunë të kryer në të njëjtën zonë më 2 tetor.
Sipas pamjeve të publikuara nga Policia, dokumentohen momentet kur 26-vjeçari vjedh me dhunë varëset në të dyja rastet. Në njërin rast, një grua shfaqet duke u shoqëruar nga një burrë, i cili përpiqet ta ndalojë autorin pas grabitjes. Ndërsa në rastin tjetër, 26-vjeçari i afrohet një gruaje që shoqërohet nga dy fëmijë dhe i merr varësen.
"Shërbimet e Komisariatit të Policisë Nr. 6 finalizuan operacionin e koduar “October”, gjatë të cilit u arrestua në flagrancë shtetasi K. K., 26 vjeç, pasi dyshohet se i ka vjedhur me dhunë varësen nga qafa, një shtetaseje, në rrugën “Konferenca e Pezës”. Nga veprimet hetimore dyshohet se i arrestuari ka kryer vjedhje me dhunë, në të njëjtën zonë, edhe më datë 02.10.2026.", njofton Policia. /ZËRI
