SHKODËR-Detaje të reja janë zbardhur nga ngjarja e ndodhur më datë 26 mars në Shkodër, ku Mikelain Toma dhe David Simoni u arrestuan, pasi dyshohej se ishin nisur për të vendosur tritol. Policia pas 5 ditësh ka gjetur pakon me lëndë plasëse në lagjen “5 Heronjtë” në Shkodër. Sipas bluve pako dyshohet se është hedhur nga Mikelian Toma dhe David Simoni më 26 Mars, ditën e arrestimit të tyre, kur tentuan t'i iknin Policisë.
“Në vijim të informacionit të dhënë më datë 26.03.2025, për arrestimin e shtetasve M. T. dhe D. S., të cilët nuk iu bindën urdhrit të Policisë, për të ndaluar motomjetin me të cilin lëviznin, me targë të vjedhur dhe me numër shasie të ndryshuar, bëjmë me dije se nga kontrollet e kryera në vijim të veprimeve hetimore për këtë rast, dje, në lagjen “3 Heronjtë”, është gjetur një pako me lëndë të dyshuar plasëse, e cila dyshohet se është hedhur aty, nga këta shtetas, më datë 26.03.2025. Pakoja u sekuestrua në cilësinë e provës materiale”, thuhet në njoftimin e policisë.
Ndërkohë një ditë më parë Policia ka zbuluar një tjetër banesë në përdorim të Tomës, në fshatin Dajç, pronari i së cilës është shtetasi me iniciale G.V., rezident në Itali. Nga kontrolli u gjetën dhe sekuestruan në cilësinë e provave materiale, 2 armë zjarri pushkë dhe municion luftarak, të cilat dyshohet se i kishte siguruar dhe i mbante Mikelian Toma.
Simoni dhe Toma u arrestuan më 26 mars. Ata dyshohet se ishin nisur për të vendosur një sasi tritoli, të cilin e hodhën gjatë kohës që kanë qenë në ndjekje nga Policia. Motori me të cilin lëviznin dy të rinjtë, u pa në mënyrë rastësore në një prej rrugëve të lagjes “Xhabije”. Gjatë kontrolleve të mëtejshme, në automjetet e tyre janë gjetur një bidon me benzinë, një silenciator dhe një sasi kokaine.
Ende nuk dihet se kush ishte shënjestra e dy të rinjve, të cilët kanë heshtur para hetuesve./ZËRI
