GREQI- Tre ditë më parë, Policia kufitare është vendosur në ndjekje të një skafi të ardhur nga ishujt Fan të Greqisë. Sipas Policisë shqiptare, gjatë kontrolleve të kryera në bashkëpunim me Guardia di Finanza, roja bregdetare ka gjetur 43 bidona plastikë që dyshohet se janë të mbushur me lëndë hidrokarbure. Bidonat u gjetën dhe u sekuestruan në zonën e Triportit, por nuk japin detaje të tjera. Vetëm bëjnë me dije se lidhur me rastin vazhdojnë hetimet pa bërë me dije asnjë detaj.
Ndërkohë nga mediat është mësuar se skafi që qarkulloi në ujërat shqiptare, bënte linjën e trafikut të drogës Turqi-Greqi.
Edhe pse është dhënë sinjalizimi dhe në ndjekje të tij është vendosur Policia shqiptare, së bashku me Guardia di Finanza-n, sërish nuk kanë arritur që ta ndalnin dhe skafi ka arritur që t'i shpëtojë Policisë. Vetëm gjatë kontrolleve pranë ishullit të Sazanit, Policia kufitare në bashkëpunim me Guardia di Finanzia, arritën të gjenin bidonat e mbushura me benzinë. Ka dyshime se benzina do të përdorej për të furnizuar skafin.
NJOFTIMI I POLICISË:
DVKM Vlorë
Intensifikohen kontrollet përgjatë vijës bregdetare, verifikohen mbi 200 mjete lundruese. Drejtoria Vendore për Kufirin dhe Migracionin Vlorë ka shtuar kontrollet dhe patrullimet përgjatë gjithë vijës bregdetare të qarkut, me qëllim garantimin e rendit dhe sigurisë në hapësirën detare, si dhe parandalimin e çdo veprimtarie të paligjshme që mund të zhvillohet në këtë hapësirë. Gjatë 10 ditëve të fundit, në bashkëpunim me Repartin Delta Force, Guardia di Finanza dhe strukturat e tjera partnere, janë realizuar kontrolle intensive nga toka dhe deti, me fokus zonat më të frekuentuara nga mjetet lundruese. Si rezultat, janë verifikuar mbi 200 mjete lundruese, të cilave iu është kontrolluar dokumentacioni përkatës, pajisjet e sigurisë, si dhe respektimi i itinerareve të miratuara. Këto veprime synojnë jo vetëm garantimin e lëvizjes së sigurtë për qytetarët dhe turistët, por edhe forcimin e kontrollit për të parandaluar rastet e trafikimit dhe krimet mjedisore. Gjatë kontrolleve të kryera në bashkëpunim me Guardia di Finanza, DVP Vlorë dhe Rojen Bregdetare , u konstatuan duke pluskuar në det, 43 bidona plastikë që dyshohet se janë të mbushur me lëndë hidrokarbure. Bidonat u sekuestruan në SPK Triport. Vijojnë veprimet hetimore për këtë rast. Drejtoria Vendore për Kufirin dhe Migracionin Vlorë mbetet e angazhuar për të garantuar një sezon turistik të qetë dhe të sigurtë, ndaj do të vijojë kontrollet dhe patrullimet përgjatë gjithë vijës bregdetare. Qytetarët, për çdo rast nevoje për ndihmë dhe për të denoncuar paligjishmëritë, mund të telefonojnë në numrin pa pagesë 112./ZËRI
