VLORË- Gjykata e Apelit la në fuqi masën e sigurisë “arrest me burg” për Erald Cenajn, i cili dyshohet për sigurimin e kushteve të vrasjes së Kristjan Markut në Vlorë. Cenaj i ka mohuar akuzat e ngritura ndaj tij, por sipas hetimeve makina e përdorur nga autorët për të kryer atentatin kishte hyrë në vitin 2022 në Shqipëri dhe ishte blerë nga ai. Cenaj pretendoi se e kishte shitur pa dokumente një personi tjetër, gjë që çoi në arrestimin e tij.
Pretendimet e tij, nuk janë marrë të besueshme nga gjyqtarja Alma Kolgjoka, e cila miratoi masën e arrestit me burg.
36-vjeçari nga Kukësi, Erald Cenaj u arrestua pasi një numer shasie nuk ishte fshirë në motorin e makinës që u përdor nga autorët për atentatin ndaj të riut. Ishte pikërisht kjo që çoi në gjurmët e Cenajt, i cili u arrestua për atentatin e ndodhur më 13 janar të 2025 në Novoselë, Vlorë.
Sipas dosjes hetimore, ekzekutorët kishin fshirë numrin e shasisë së makinës, por kishin lënë të njëjtin numër të stampuar në motorin e makinës, të cilën e dogjën disa minuta pas ngjarjes. Hetuesit zbuluan se makina ka hyrë në Shqipëri në vitin 2022 përmes doganës së Morinës, nga një shtetas nga Kosova. Ai e pranoi se makina është e tij, dhe ka pretenduar se ia ka shitur Cenajt. 36-vjeçari e pranoi se e ka blerë makinën, por ia ka shitur një personi tjetër në Shqipëri pa asnjë dokument, por nuk e mban mend blerësin e makinës dhe shumën për të cilën e shiti. Kjo deklaratë, solli në arrestimin e tij nga Policia e Vlorës dhe të ngrihej akuza për veprën penale “Sigurim i kushteve për të kryer vrasje”.
Për atentatin ndaj 30-vjeçarit, Kristjan Marku është arrestuar vetëm Erald Cenaj nga Kukësi.
Vrasja e Kristjan Markut
Dyshimet janë se autorët janë 3 dhe mund të jenë nga Vlora, ose ekzekutorët kanë kërkuar ndihmë nga vendas të zonës që e njohin mirë territorin që të largohen pa u pikasur nga asnjë patrullë policie. Kjo pistë hetimore është ngritur për shkak të dinamikës së ngjarjes, nga vjedhja e targave të oficerit të policisë, e cila ndodhi natën që do të kryehej vrasja. Sipas grupit hetimor, nëse zbardhet vjedhja e targës, hetimi do të jetë më i lehtë për të zbardhur ngjarjen. Grupi hetimor shprehet se vrasja e kryer teksa automjetet është në ecje është bërë nga persona me eksperiencë.
Kristjan Marku, i njohur edhe me mbiemrin Bardhi është nipi i Martin Bardhit të vrarë në Rrëshen në Shtator të vitit 2023. Për këtë ngjarje u vu në pranga Martin Bardhi, ndërsa në kërkim u shpallën djali i tij, Enrik Bardhi dhe nipi Kristjan Marku, i cili tashmë është pjesë e listës së gjatë të viktimave të familjes Bardhi./ZËRI
