TIRANË- Deri në 70 mijë lekë shtesë mbi pagë do të jetë vlera që do të përfitojnë disa kategori në Forcat e Armatosura. Lajmi është bërë me dije nga ministri i Mbrojtjes, Pirro Vengu, i cili është shprehur se Forcat e Armatosura po vlerësojnë profesionistët në uniformë, si dhe ka ardhur nevoja për të pasur ushtarakë të mirëpaguar, mirëstërvitur e mirëpajisur.
Konkretisht, shtesa për kushte të veçanta pune për FA të Agjencisë së Inteligjencës dhe Sigurisë së Mbrojtjes shkon nga 13 mijë në 20 mijë lekë.
Ndërsa për Agjencinë e Sistemeve të Ndërlidhjes e Informacionit shtesa shkon nga 35 mijë në 40 mijë lekë.
Nga ana tjetër, efektivët e Njësisë Ushtarake të Sigurisë Kibernetike përfitojnë një shtesë që shkon nga 50 mijë në 70 mijë lekë.
“Efektivët e Njësisë Ushtarake të Sigurisë Kibernetike, Agjencisë së Sistemeve të Ndërlidhjes e Informacionit dhe ata të Agjencisë së Inteligjencës dhe Sigurisë së Mbrojtjes përfitojnë rritje të konsiderueshme në pagesën shtesë për kushte të veçanta pune e shërbimi,”- tha Vengu.
