TIRANË-Tetë ish-zyrtarë të Shoqërisë së Parë Financiare të Zhvillimit, FAF, janë dërguar në gjyq për shpërdorim detyre, mes tyre administratorin, Dashamir Qeli dhe ish-kryetaren e Këshillit Mbikëqyrës, Ilda Malile. Sipas njoftimit zyrtar të Prokurorisë, shkeljet lidhen kryesisht me blerjen e një automjeti në vitin 2016, me vlerë 1.6 milionë lekë, si dhe me vendimin për punësimin e një shoferi të ri.
Makina e blerë, sipas Prokurorisë ishte parashikuar të zëvendësonte punën e 6 mjeteve. Por hetuesit kanë arritur në përfundimin se një automjet i vetëm nuk mund të përmbushte nevojat e FAF-it, që kishte 30 degë në 30 rrethe të vendit. Pavarësisht se kishte tashmë 6 shoferë pa mjete, për makinën e sapoblerë u hap edhe një vend i ri pune dhe u punësua një shofer i shtatë.
Hetimi për këtë procedim penal nisi në vitin 2020, ndërsa çështja i ishte përcjellë Prokurorisë së Tiranës nga SPAK.
Njoftimi i Prokurorisë:
Prokuroria e Tiranës përfundon hetimet dhe dërgon në gjyq administratorin, kryetaren dhe anëtarët e Këshillit Mbikëqyrës së FAF sh.a., për ‘Shpërdorim detyre’.
Prokuroria pranë Gjykatës së Shkallës së Parë e Juridiksionit të Përgjithshëm, Tiranë përfundoi hetimet dhe dërgon në gjyq administratorin, kryetaren dhe anëtarët e Këshillit Mbikëqyrës të Shoqërisë së Parë Financiare të Zhvillimit (FAF sh.a.) shtetasit I.M., A.K., Ll.P., D.Q., A.C., M..L., O.D. dhe E.Xh të akuzuar për veprën penale ‘Shpërdorim detyre’ parashikuar nga neni 248 i Kodit Penal.
Hetimet mbi procedimin penal nr.248 të vitit 2020, sjellë nga Prokuroria e Posaçme, konstatuan një sërë shkeljesh të evidentuara edhe nga Kontrolli i Lartë i Shtetit me procedurat e prokurimeve të kryera nga këta persona.
Nga hetimet rezultoi se procedurat e ndjekura. specifikisht për blerje automjeti, janë realizuar pa miratimin e Ministrit të Financave në atë kohë dhe në dosjen e tenderit nuk administrohet argumentimi i kritereve të veçanta për kualifikim, në kundërshtim me ligjet në fuqi. Për sa më sipër është ngarkuar me përgjegjësi administratori D. Q. Si dhe Këshilli Mbikqyrës i përbërë nga kryetarja shtetasja I.M. si dhe anëtarët A.C., A.K., M.L., Ll.P., O.D., si dhe A.Gj. Ky mjet rezultoi gjithashtu se ishte më parë në pronësi të kryetares së Këshillit Mbikëqyrës, shtetases I.M. ish-sekretare e Përgjithshme e Ministrisë së Shëndetësisë.
Hetimet arritën në përfundim se mjeti i blerë nga FAF sh.a., me vendimin e asamblesë në vlerën 1 600 000 lekë me tvsh, që do zëvendësonte punën e 6 mjeteve, nuk mund të përmbushte nevojat për 30 degët në 30 rrethe të Shqipërisë të kompanisë. Po kështu dhe caktimi i një vendi shtesë pune për shofer për këtë mjet të sapoblerë, kur ishin tashmë 6 shoferë të tillë pa mjete dhe që mernin rrogat, ishte i tepërt dhe në kundërshtim të hapur me ligjin.
Në përfundim të hetimeve, me provat dhe aktet e administruara, Prokuroria pranë Gjykatës së Shkallës së Parë të Juridiksionit të Përgjithshëm vlerësoi se provohet se nga ana e shtetasve të pandehur I.M., A.K., Ll.P., D.Q., A.C., M.L., O.D., dhe E.Xh., me veprime aktive ose mosveprime, janë konsumuar elemente të figurës së veprës penale të parashikuar nga neni 248 i K.Penal.
