BRAZIL- Një aksident i ndodhur pas përplasjes së një autobusi, një furgoni dhe një makine ka shkaktuar të paktën 35 të vdekur pranë qytetit Teófilo Otoni, në Minas Gerais, në juglindje të Brazilit. Tragjedia ka ndodhur në agim, kur autobusi është përplasur me kamionin përballë kur i ka shpërthyer njëra rrotë. Menjëherë është përplasur edhe makina pas autobusit duke shkaktuar zjarr. Tre pasagjerët në atë mjet kanë shpëtuar, por janë në gjendje të rëndë.
Një nga zjarrfikësit që merrte pjesë në përpjekjet e shpëtimit të trupave, Alonso Vieira, shpjegoi në një deklaratë për shtypin lokal se autobusi ishte plot, me 48 pasagjerë në bord.
"Disa arritën të dilnin, por shumica dërrmuese, për fat të keq, u karbonizuan për vdekje," tha ai.
Pas përfundimit të transferimit të viktimave, departamenti i zjarrit Minas Gerais ka vlerësuar numrin e viktimave, që ka shkuar në 35, duke përfshirë të paktën një fëmijë.
Autobusi u nis nga qyteti i São Paulo të premten në mëngjes për në brendësi të Bahia, rreth 1500 kilometra në veri. Guvernatori i Minas Gerais, Romeu Zema, ka shpjeguar në rrjetet e tij sociale se sapo mësoi për aksidentin, mobilizoi avionin e kabinetit të tij ushtarak për të sjellë trupa në zonë dhe shprehu solidaritetin me viktimat.
“Ne po punojmë që familjet e viktimave të mirëpriten në mënyrë që ata të përballen me këtë tragjedi në mënyrën më humane të mundshme në prag të Krishtlindjes, një datë kaq e rëndësishme për të gjithë”, tha ai.
Rruga ku ndodhi aksidenti, BR-116 , njihet si më vdekjeprurja në Brazil: në vitin 2023 mori jetën e 559 personave. Aksidentet e autobusëve me viktima janë relativisht të shpeshta në Brazil, kryesisht sepse është mjeti më i popullarizuar i transportit në një vend pa rrjet hekurudhor. Më pak se një muaj më parë, një tjetër aksident i ngjashëm shkaktoi vdekjen e 17 personave në shtetin e Alagoas.
