TIRANË- Qeveria europiane e futbollit, UEFA ka publikuar këtë të martë gjyqtarët që do t’i drejtojnë ndeshjet e Kampionatit Evropian 2024. Mes tyre është dhe një gjyqtar shqiptar. Bëhet fjalë për Bekim Zogajn, i cili do të jetë gjyqtar anësor, si pjesë e gjyqtarëve nga Zvicra në kampionatin europian.
Përmes një postimi në rrjetet sociale, Zogaj shkruan se është nder dhe privilegj për të që të jetë pjesë e kampionatit më të rëndësishëm europian.
“Nder dhe privilegj përzgjedhja si asistent në Kampionatin Evropian 2024 në Gjermani”, shkroi Zogaj
Kampionati që fillon më 14 qershor dhe përfundon më 14 korrik të këtij viti do të përmbajë gjyqtarë nga shtete të ndryshme të Evropës. Premiera po pritet me padurim nga tifozët, pasi pjesë e 24 vendeve pjesëmarrëse është edhe Shqipëria. Tashmë tifozët shqiptarë i kanë prerë biletat për në Gjermani./ZËRI
