Pesë vite pas hyrjes së VAR në ligën angleze, tensionet dhe kundërshtimet për përdorimin e teknologjisë në futboll mbeten, por pavarësisht “zërave” protestues dobia e tij nuk vihet në dyshim. Dhe kjo u vërtetua sot në votimin e zhvilluar në mbledhjen e përgjithshme të Premier League, ku një nga temat e diskutuara ishte propozimi i Wolves për heqjen e VAR-it!
Ky i fundit, në një letër drejtuar organizatorit, kishte renditur 9 arsye pse konsideronte se përdorimi i tij duhet të hiqet nga sezoni i ardhshëm (duke u ndalur kryesisht në kohën që duhet për të marrë një vendim, por edhe në vendimet e gabuara). Wolves iu deshën edhe 13 vota të tjera për të kaluar propozimin e tyre, megjithatë votimi përfundimtar i gjeti të vetëm dhe të braktisur me 19 skuadrat e tjera që votuan jo.
Kështu, VAR- i vazhdon normalisht, por me disa elementë të rinj nga vjeshta, si offside gjysmë automatike, dhe fakti që tifozët do të mund të dëgjojnë drejtpërdrejt dialogët e arbitrit me VAR-in, ndërkohë që do të rishikohet një fazë e caktuar./ZËRI
