SHBA- Tajger Uds (Tiger Woods) është i njohur për gjerdanin pafund të lëndimeve, i vetmi që mund t’ia konkurronte gjerdanin e pafundmë të sukseseve. Rreth 20 herë është shkëputur i detyruar nga karriera e tij e shkëlqyer për trajtime rikuperuese ose operacione nga golfi.
Ai njoftoi edhe një herë të martën se ka pësuar një lëndim në tendinën e Akilit të këmbës së tij të majtë, duke e detyruar atë të largohet nga fusha për një periudhë të gjatë kohe derisa të rikuperohet. Në të shkuarën golfisti rekordmen ka patur edhe një operacion në shtyllën kurrizore dhe një ndërhyrje të rëndësishme në këmbë, por ka dëshmuar përherë aftësi për t'u rikthyer dhe për të fituar sërish. Cleveland Clinic raportoi për CNN se shumica e dëmtimeve të këtij lloji në tendinë kërkojnë nga katër deri në gjashtë muaj për t'u shëruar.
Fituesi i 15 titujve Majors, rekordmeni i 82 fitoreve në PGA Tour, nr. 1 i botës për periudhën më të gjatë të histories së golfit (683 javë), ka të ngjarë që të qëndrojë larg sportit, të cilin e ndihmoi të bëhej më popullor me famën dhe sukseset e tij, edhe për më e pakta 4 muaj. Në moshën 49-vjeçare mbetet për t'u parë nëse fiziku i tij do të përgjigjet sërish në mbështetje të Legjendës, për ta rikthyer në nivelet e mëparshme./ZËRI
