Mbrëmë u luajtën ndeshjet e kthimit të 1/8 të Ligës së Kampioneve. Barcelona ripërsëriti vetveten dhe pjekurinë për të qenë në çerekfinale, Interi fitoi sërish ndaj Fejnordit, Bajerni i Mynihut shfrytëzoi mungesën e Virtcit te kundërshtarët dhe epërsinë e ndjeshme të ndeshjes së parë, PSG-ja gjeti fatin e munguar të ndeshjes së parë dhe fitoi me penallti ndaj Liverpulit në fortesën e tij, "Anfield".
Barcelona u kualifikua për në çerekfinale e para nga 4 skuadrat që luajtën të martën. Në përballjen me Benfikën u regjistruan disa rekorde interesante për regjistrat e UEFA-s, organizatores zyrtare te Ligës së Kampionëve. Rafinja shënoi dy gola dhe Lamin Jamal një tjetër, Barcelona kaloi në çerekfinalet e Ligës së Kampionëve me një fitore 3-1 ndaj Benfikës. Klubi katalanas arriti rezultatin total 4-1 pas fitores 1-0 javën e kaluar. Sipas shortit do të ndeshet në 1/4 me një këto dy skuadra: Borusia e Dortmundit ose Lila. Dy golat e Rafinjës e bëjnë atë shënuesin më të mirë në Ligën e Kampionëve këtë sezon me 11 gola. Ai shënoi edhe golin e vetëm javën e kaluar në Lisbonë. Sulmuesi brazilian e çoi Barcelonën në avantazh në minutën e 10-të, pastaj asistoi në golin e Jamalit në minutën e 27-të, për të shtuar golin e tij të dytë në minutën e 42-të. Argjentinasi Nikolas Otamendi shënoi për Benfikën në minutën e 13-të. Kjo e bën Kampionin e Botës me Argjentinën e Skalonit shënuesin më të vjetër të një ndeshjeje eliminatore të Ligës së Kampionëve në moshën 37 vjeç dhe 27 ditë, sipas UEFA-s. Goli i Jamalit mbartte po ashtu një rekord, atë të shënuesit të dytë më të ri në moshën 17 vjeç dhe 241 ditë, sipas UEFA-s.
Interi, nëse synon finalen e Mynihut, i duhet të kalojë nga Bajerni i Mynihut. Dje bluzinjtë mundën Fejenordin e Roterdamit 2-1 në ndeshjen e kthimit të 1/8-ave të Ligës së Kampionëve. Kjo fitore i siguroi përballjen e fortë në çerekfinale kundër Bajernit të Mynihut. Në San Siro, Turami shënoi një gol spektakolar për të kaluar zikaltërit në avantazh, një penallti e Moder barazoi shifrat për holandezët. Menjëherë pas pushimit, Çalhanoglu riktheu epërsinë për Interin me një goditje të saktë penalltia. Pavarësisht disa rasteve për ta mbyllur ndeshjen me një rezultat më të thellë, skuadra e Inzaghit menaxhoi fitoren dhe tashmë përgatitet për sfidën e madhe kundër Bajernit.
Bajerni i Mynihut e pati disi më të lehtë ndaj një Levekuseni të bllokuar. Skuadra bavareze pati edhe një herë Herri Kejnin si flamurtar të mbrëmjes: ai shënoi një gol dhe asistoi një tjetër. Në ndeshjen e parë në Mynih pati shënuar edhe dy gola të tjerë. Bajer Leverkuseni u mund edhe në ndeshjen e kthimit 2-0 në fazën e 1/8-ve të Ligës së Kampionëve. Leverkuseni i Alonsos e ndjeu mungesën e kreativitetit dhe të ritmit të mesfushorit të dëmtuar, Florian Virc. Rezultati i përgjithshëm 5-0 në favor e shpie Bajernin në çerekfinale ndërsa Kejni, tashmë në kuotën e 10 golave, bëhet i pari futbollist anglez që arrin këtë numër golash në një sezon të Ligës së Kampionëve.
Në "Anfield" të Liverpulit PSG-ja luajti po aq mirë sa në fushën vendëse. Këtë herë pati fatin në krahun e saj dhe e fitoi kohën e rregullt 0-1. Goli u shënua nga Dembeleja në minutën e dymbëdhjetë. Dembeleja ishte një nga kolonat e këtij suksesi me zhdërvjellësinë dhe lëvizshmërinë e tij. Me rezultatin 0-1 ndeshja shkoi në shtesa ku PSG-ja, kryesisht me zëvendësuesin Due shprehu më shumë dëshirë dhe këmbëngulje. Te gjuajtjet e penalltisë, njëjtë si edhe gjatë lojës, Donaruma u tregua heroik, priti dy penallti: të Darvin Nunjezit dhe Kurtis Xhonsit. Due, zëvendësimi shumë cilësor i i Luis Enrikes që u dha shumë lëvizshmëri dhe zgjuarsi zhvendosjeve sulmuese të parizienëvw, e mbylli më së miri një festival penalltish të gjuajtura me mjeshtëri të lartë nga lojtarët e PSG-së. Ai shënoi golin vendimtar dhe kaloi të tijtë në çerekfinale, ku do të gjejë njerën nga skuadrat mes Bryzhit dhe Aston Vilës.
Sot luhen 4 takimet e tjera të 1/8-s, ose fazës me gjashtëmbëdhjetë skuadra, derbi i Madridit, Real-Atleriko, PSV Eindhohven-Arsenal, Borusia e Dortmundit me Lilën dhe Bryzh-Aston Vila./ZËRI
