SPANJË-Dje u luajt pjesa e mbetur e ndeshjeve të javës së njëzetë e nëntë në kampionatin spanjoll, La Liga. Menjëherë ra në sy fitorja e Barcelonës 4-1, si vendëse, përballë Gironës. Dy herë Levandovski dhe një herë Ferran Torresi, i shtuan tre gola autogolit të Gironës, pas gjuajtjes së Jamalit. Barcelona rivendos distancën e barazuar një ditë më parë me Realin e Madridit, 3 pikë. Ndërsa Levandovski me dy golëshin e tij shënon një distancë 3-golëshe me ndjekësin e tij në listë golashënuesish të La Ligës, Mbapenë e Realit të Madridit.
Në ndeshjet e tjera Atletikoja e Bilbaos barazoi pa gola me Osasunën, ndërsa derbin andaluz e fitoi Real Betisi përballë Sevijës. Bardhjeshilët u dukën se kishin diçka më tepër se kundërshtarët dje, në raste, aksione e kontrolle të topit. Golat u shënuan të tre në pjesën e parë. E para shënoi Sevija me Ruben Vargasin që në minutën e shtatëmbëdhjetë shëndrroi në gol një asist të Lukebaios. Avantazhi i tyre zgjati vetëm tetë minuta, Joni barazoi në 1-1 në hyrje të zonës pas një topi të kthyer lehtë nga Sabali. Në minutën e fundit shtesë të pjesës së parë, Kuço Hernandez, më i miri për të tijtë, shënoi me zgjuarsi pas një asisti të Iskos. 2-1. Rezultati në pjesën e dytë mbeti i pandryshuar.
Në pjesën e parë u mbyll edhe ndeshja mes Getafes dhe Vijarealit, ku miqtë fituan 1-2. Fitore me shumë rëndësi ishte ajo e Valencias në "Mestaja". Klubi historik në çdo javë është duke diskutuar qëndrimin. Fitorja 1-0 ndaj Majorkës, të cilës i mungonte Muriqi, me golin e Diego Lopezit, i dha jo pak oksigjen 9 javë nga fundi.
La Ligën e udhëheq Barcelona e ndjekur nga Reali i Madridit, Atletiko e Madridit, Atletiku i Bilbaos, Vijareali dhe Real Betisi pasojnë renditjen në zonën evropiane. Në zonën e rrezikut, me Valencian e shkëputur 4 pikë nga e poshtmja, Alavesi dhe Leganesi me 27 pikë, Las Palmasi me 25 por me një ndeshje më pak dhe Vajadolidi me 16 pikë, do të diskutojnë qëndrimin për 3 skuadra./ZËRI
